Орон нутгийн төсвийн хөрөнгө оруулалтаар Өмнөговь аймгийн хэмжээнд сумын ЗДТГ-ын байрыг шинэчилж байна.

2017 онд хоёр сумын Засаг даргын тамгын газрын барилгыг шинээр барьж ашиглалтад оруулжээ.

Өмнөговь аймгийн хэмжээнд иргэдэд хүрэх төрийн ажил, үйлчилгээг сайжруулах зорилгоор сумдын ЗДТГ-ын байрыг ээлж дараатайгаар шинэчилж буй. Малчид, хөдөлмөрчид ая тухтай орчинд, хүнд суртал хүлээлтгүй төрийн үйлчилгээг авах эрхтэй.

Ийнхүү өнгөрсөн аравдугаар сарын 27-нд Өмнөговь аймгийн аялал жуулчлалын бүс нутаг болох Булган сум Засаг даргын тамгын газрын шинэ байртай боллоо.

Тамгын газрын хуучин байр нь 1989 онд ашиглалтад орж байсан. Стандарт бус, өрөө тасалгаа жижигхэн бөгөөд 2-3 мэргэжилтэн нэг өрөөнд суудаг байсан ба иргэд төрийн үйлчилгээ авахад нэн бэрхшээлтэй байсан аж.

Тус сумын ЗДТГ-ын шинэ байрыг орон нутгийн төсвийн 908 сая төгрөгөөр барьж байгуулсан ба төрийн үйлчилгээг нэг дор төвлөрүүлсэн нэг цэгийн үйлчилгээтэй болсноороо ач холбогдолтой онцлог байлаа.

Тодруулбал хөдөө аж ахуй, байгаль орчин, халамж, нийгмийн даатгалын 10 гаруй мэргэжилтэн тус сумын дөрвөн багийн 2000 гаруй иргэнд төрийн үйлчилгээг нэг дороос хүнд сурталгүй хүргэж байна.

Мөн энэ онд тус суманд Соёлын төвийн засварын ажлыг хийсэн ба ирэх онд сумын цэвэр бохирын асуудлыг шийдвэрлэж, Соёл спортын цогцолборыг барьж байгуулахаар нийгэм эдийн засгийг хөгжүүлэх үндсэн чиглэлд тусгажээ.