Япон улсын орон сууцны барилгын "Секисүй кемикал" компани Тайланд улсад байгаль орчинд ээлтэй, эрчим хүчний хэмнэлттэй, мөн нарны эрчим хүчийг хуримтлуулах зай хураагуураар тоноглосон эко байшин барьж, борлуулахаар төлөвлөж байна.

Энэ төлөвлөгөөнийхөө дагуу тус компани Тайландын хамгийн том үл хөдлөх хөрөнгийн компанитай хамтран ажиллаж байна. Төслийн дагуу тус компани Тайландын нийслэл Банкок хотноо 30 сая америк долларын өртөг бүхий 100 гаруй байшинг барьж байгуулах юм.

Японы талын албан ёсны төлөөлөгчдийн мэдээлж байгаагаар уг байшинд суурилуулах нарны зай хураагуур нь цахилгаан эрчим хүчийг 75 хувь хүртэл бууруулах боломжтой гэж мэдээлж байна.

Мөн орчин үеийн техник технологийг ашиглаж, нарны зай хураагуурыг гар утасны тусламжтайгаар хянах боломжтой юм байна. Түүнчлэн агаарын бохирдлыг ч шүүх тусгай шүүртүүртэй тоноглохоор төлөвлөсөн байна.

Нарны зай хураагуурт хураагдсан эрчим хүчээр гэрийн цахилгаан хэрэгслүүдийг цэнэглэхээс гадна бүрэн цахилгаанаар ажилладаг автомашиныг ч цэнэглэж ашиглах боломжтой юм байна.