Албан ёсны мэдээллээр манай улсын хэмжээнд 18 нас хүртэлх 940 гаруй хүүхэд нийт 37 асрамжийн газарт хүмүүждэг байна. Эдгээр газруудын томоохон төлөөлөл болсон МУ-ын хүүхэд, гэр бүл хөгжлийн ӨНӨР БҮЛ төв нь 1974 оноос хойш өнөөдрийг хүртэл үйл ажиллагаагаа тасралтгүй явуулсаар иржээ. Тус төвд одоогоор 2-18 насны 160 гаруй эцэг эх байх эрх нь хязгаарлагдсан, өнчин хүүхдүүд байдаг. Өнгөрсөн жилээс эхэлж тэд байрныхаа засварыг хийж эхэлжээ. Биднийг нэг сард сурвалжилахаар очиход хүүхдүүд ийм нөхцөлд амьдарч байсан. 5-7 хүүхэд нэг өрөөнд, хичээл хийх ширээ нь хүрэлцэхгүй, хүүхдүүд өөрсдөө хоолоо хийж идэх чадварт ч суралгүй насанд хүрч амьдралд хөл тавьж байсан.

Угаасаа эндэхийн хүүхдүүд нэг өрөөндөө эгч дүүс болон том нь багыгаа харж хандан өсч торнидог. Тэдний энэ халуун ам бүлийн уур амьсгалыг илүү бодитой болгохын тулд Өнөр бүлийнхэн өрөө тасалгааг нь нэг айл шиг засч тохижуулжээ.  Нэг өрөөнд 4 хүүхэд байлаа гэхэд 7 хоногоор хоол хүнсээ аваад багштайгаа хамтраад өөрсдөө хоолоо хийж иддэг болжээ.

Мөн 50-60 хүүхдийг нэг багш хариуцаж ажилладаг байсан бол одоо 10 хүүхдийг нэг багш хариуцаж хүүхдүүдтэй илүү ойроос харьцаж тэдний хичээл, дугуйлан гээд бүхий л зүйлд нь санаа тавьж ажиллаж байна гэв.

Амьдрах орчинг сайжруулснаас гадна хүүхдүүдийг амьдралын зөв дадалд суралцуулах сургалт, дугуйланг хичээллүүлдэг байна. Ингэснээр хүүхдүүд нийгмийн амьдралд гарахдаа ахуйн боловсрол эзэмшээд гарах нь эргээд нийгэмдээ маш том эерэг үр дүнг үзүүлнэ гэж багш нар ярилаа. Энэ бол сүүлийн 30 жилд хийгдээгүй томоохон өөрчлөлт, бас хүмүүжлийн нэг шинэ арга барил гэж мэргэжилтнүүд ярьж байна.