АНУ-ын иргэн Элла Кэмпбелл гэгч эмэгтэй онгоцноос шүхрээр буусан талаарх мэдээлэл олон улсын анхаарлыг татаад байна. Тодруулбал, тэрээр 94 насныхаа төрсөн өдрөөр шүхрээр буухыг хүссэн юм байна. Түүний хүүхэд ач зээ нар нь эхэндээ санаа ихэд зовж байсан хэдий ч мэргэжлийн шүхэрчний хамтаар шүхрээр буулгах санааг дэмжин, эмчид үзүүлэн эрүүл мэндийн байдлаа хянуулсны дараа онгоцноос үсэрч болно гэсэн зөвшөөрлийг авчээ.

Түүний шүхрээр буулт хийж байгаа дүрс бичлэг Youtube цахим хуудаснаа тавигдсаны дараа маш их хандалтыг авсан байна. Энэ үйл ажиллагааг “Poconos Skydivers” шүхрийн компани зохион байгуулж хамтран ажиллажээ. Онгоц газраас дээш 3 мянган метрийн өндөрт нислэг хийж, улмаар энэ өндрөөс шүхрийн үсрэлтийг хийжээ.

Элла Кемпбелл өөрийн энэ зориг гаргаж хийсэн үйлдэлдээ маш их баяртай байгаа гэдгээ илэрхийлж, төрсөн сэтгэгдлээ үр хүүхдүүдтэйгээ хуваалцсан нь яг л эргээд залуу насандаа очоод ирсэн мэт мэдрэмжийг авснаа онцолсон байна.