Цахим худалдааны Амазон компани хэрэглэгч, захиалагчдынхаа худалдан авсан бараа материалыг нисдэг дронд тээвэрлэн хүргэж өгөх үйлчилгээг салбартаа нэвтрүүлэхээр амжилттай ажиллаж байгаа. Гэхдээ дроны тээвэрлэлтийн явцад учирч болох аливаа эрсдэлийг бууруулах зорилгоор Амазон компани тээвэрлэгч нисдэг дроноо агаарт өөрөө өөрийгөө устгах программаар хангахаар болжээ. Үүнтэй холбоотой төсөл хөтөлбөр, техник төхөөрөмжөө энэ долоо хоногийн эхэнд патентжуулаад байгаа юм байна.

Амазон компанийн дроны тээвэрлэлтийн хэсгийн мэргэжилтнүүдийн судалгаа, шинжилгээнээс гарсан дүгнэлтээр хэрэв захиалга хүргэхээр нислэг үйлдэж байгаа дроныг гадны болон ямар нэгэн шалтгааны улмаас хүрэх ёстой газраа хүрч очилгүй эвдрэл гэмтэлтэй тулгарвал өөрөө өөрийгөө устгасан нь хамгийн зөв алхам болохыг мэдээлсэн байна. Учир нь дроны тээвэрлэж байгаа бараа материалыг хулгайлж авах гэсэн хүмүүс гарч ирэхгүй гэсэн шалтгаан байхгүйг онцлоод үний хувьд өндөр болон хямд өртөгтэй бараа материалыг бусдын гарт алдвал үүний дараа хууль эрх зүйн хүрээнд багагүй асуудлууд ар араасаа гарч ирнэ гэж үзэж байгаа юм байна. Амазон компанийн зүгээс мэдээлснээр, дрон агаарт нислэг үйлдэж байхдаа техник төхөөрөмж болон программ хангамжийн доголдолтой тулгарахад автоматаар өөрийгөө устгах болно гэж онцолсон байна.

Энэ нь тухайн тохиолдолд цаг хугацаандаа бараа материалаа хүлээж аваагүйн улмаас захиалагч болон компанийн хооронд үүсэх маргааныг шийдвэрлэх алхам болно гэж мэдээлсэн байна. Нисдэг дроныг ашиглан жижиг хэмжээтэй илгээмжийг тээвэрлэн хүргэж өгөх нь хотын замын хөдөлгөөн болон цаг хугацаа, үйл ажиллагааны зардлыг бууруулах гол ач холбогдолтой үйлчилгээ юм.  Үүнд ердөө 1 ам долларын зардал гарах юм байна.