АНУ-ын ерөнхийлөгч Дональд Трамп өөрийн твиттер хуудсандаа, Миний цөмийн товчлуур Умардын удирдагч Ким Жон Ын-ыхаас “илүү том, арай хүчирхэг” хэмээн мэдэгдлээ. Ийм аргаар тэрээр "цөмийн товчлуур нь хэзээд гар дор бэлэн байдаг" гэсэн БНАСАУ-ын залуу удирдагчийн хэлсэн үгэнд хариу барьж байна.

Шинжээчид энэ бүгдийг хоёр удирдагчийн үгэн сөргөлдөөн хэрээс хэтэрсэн, тэгээд ч Трампын энэ авир нийгмийн сүлжээнд хэлэлцүүлгийн гол сэдэв болоод байгааг тэмдэглэж байгаа юм.

Д.Трамп “Умард Солонгосын удирдагч цөмийн товчлуур нь хэзээд ажлын ширээн дээр нь гар дор бэлэн байдаг гэлээ. Тэгвэл надад ч гэсэн цөмийн товчлуур байдаг, миний товчлуур тэрний товчлуураас арай том, илүү хүчтэй, байнгын ажиллагаатай гэдгийг түүнд хэлээд өгөх хүн байна уу” гэж  бичсэн байна.

North Korean Leader Kim Jong Un just stated that the “Nuclear Button is on his desk at all times.” Will someone from his depleted and food starved regime please inform him that I too have a Nuclear Button, but it is a much bigger & more powerful one than his, and my Button works!

— Donald J. Trump (@realDonaldTrump) January 3, 2018

БНАСАУ цөмийн зэвсэгтэй, үүнийгээ АНУ-ын эсрэг ашиглаж болзошгүй гэж мэдэгдэж байгаа ч судлаачид "Пхеньян үнэхээр цөмийн зэвсэгтэй, гэхдээ цөмийн зэвсгээ хэрхэн яаж хүргэх технологи байгаа гэдэг нь эргэлзээтэй" гэж үздэг. Сүүлийн үед нийгмийн сүлжээг хэрэглэгчид дэлхийн удирдагчид цөмийн дайн дэгдээхүйц зүйлийг ямар ч бодолгүй, болгоомжгүйгээр ярьж байгаад сэтгэл багагүй түгшиж байна.

Гэвч Трампыг дэмжигчид түүний энэ харилцааны хэв маягийг хамгаалж, ерөнхийлөгчийн тайлбар нь нэгд, бодит үнэнийг илтгэсэн, хоёрт: АНУ-ын хүч чадлыг илтгэж байгаа юм хэмээн үзэж байна.

Үүнтэй зэрэгцэн сүүлийн үед Ким Жон Ын үнэхээр л дэлхийн нийтийг гайхшруулж байна. Тэрбээр ард иргэддээ хүргэсэн шинэ жилийн мэндчилгээндээ гэнэт "Өмнөд Солонгостой харилцан ярилцахад бэлэн" байгаагаа, мөн БНАСАУ-ын шигшээ багийг урд хөршид нь болох өвлийн Олимпд оролцуулах хүсэлтэй байгаагаа илэрхийлсэн. Магадгүй өвлийн Олимп умард болон өмнөдийн хооронд харилцааг сайжруулах шалтаг болж болохыг БНСУ-ын ерөнхийлөгч Мун Жэ Ин хэлсэн. Үүнтэй холбогдуулан Сөүл ирэх долоо хоногт талуудын хооронд өндөр төвшний уулзалт хийх санал тавьсан бөгөөд Пхеньян үүнийг нааштай хүлээн авсан. Ийнхүү хоёр орны сайд нар ирэх долоо хоногийн мягмар гарагт дундын бүсэд уулзахаар болоод байна.