Умард Солонгос улс химийн зэвсэг үйлдвэрлэхэд ашиглах зориулалттай материалуудыг Сирийн талд нийлүүлсэн гэж НҮБ-ын мөрдөн  шалгах ажиллагааны тайлан илтгэлд дүгнэснийг "Нью Иорк таймс" нийтэлснийг олон улсын хэвлэлүүд онцолж байна. 

Энэ тайландаа олон ноцтой баримтуудыг НҮБ-ын шинжээчид дэлгэжээ. Олон улсын хамтын нийгэмлэгийн энэ тайланд  тэмдэглэснээр  Умард Солонгос  2012-2017 оны хооронд нийтдээ 40 гаруй удаагийн ийм нийлүүлэлт хийсэн байна.  

НҮБ-ын мэргэжилтнүүд Пхеньянаас Дамаскт давхар зориулалтаар ашиглах боломжтой материалууд нийлүүлсэн гэж баталж байна. Түүнчлэн  Умард  Солонгосын мэргэжилтнүүд Сирийн нутаг дэвсгэр дэх пуужингийн болон химийн зэвсгийн үйлдвэрүүдэд очсон болохыг тэмдэглэсэн байна. 

Энэ тайлан илтгэлийг Умард Солонгосын эсрэг НҮБ-ын зүгээс авсан хориг арга хэмжээ мөрдөгдөж байгаа эсэхэд хяналт тавих  шинжээчдийн багийнхан гаргасан юм байна. Сири химийн зэвсэгтэй, түүнийгээ энгийн иргэдийн эсрэг ашигласан  гэх шүүмжлэлийг  эрх баригчид нь байнга няцаасаар ирсэн. Хоёр долоо хоногийн өмнө Сирийн Гадаад хэргийн сайд тус улсын армид химийн зэвсэг  байхгүй гэж бас мэдэгдэж байсныг хэвлэлүүд сануулж банйа.