АНУ-ын Ерөнхийлөгч Дональд Трамп Ирантай байгуулсан цөмийн тохиролцооноос татгалзсанаар дайн дэгдэхэд хүргэж болзошгүй гэж Францын Ерөнхийлөгч Эммануэль Макрон Германы “Шпигель” сонинд яриуцлага өгөхдөө мэдэгдсэн тухай бид өмнө мэдээлсэн.

Эммануэль Макрон "Энэ нь дайн дэгдээх аюултай. Гэхдээ Дональд Трамп дайн дэгдээхийг хүсэж байна гэдэгт би итгэхгүй” гэж цохон тэмдэглэсэн байна.

Ямар ч байсан Ерөнхийлөгч Трамп Их Британи, Герман, Францын талтай зөвлөлдөсний эцэст Вашингтон Ирантай байгуулсан тохиролцоонд үлдэх үү,  үгүй юу гэдгээ энэ сарын 12-ноос өмнө зарлахаар болжээ.

“Ирантай байгуулсан цөмийн тохиролцоо”-г эргэн харах хүрээнд АНУ-ын удирдагч 90 хоног тутамд Ираний эсрэг тогтоосон хориг арга хэмжээг иж бүрэн цуцлах уу, эсвэл үлдээх үү гэх шийдвэрээ гаргах ёстой юм байна.

2015 оны долоодугаар сарын 14-ний өдөр Иран улс болон Аюулгүйн зөвлөлийн байнгын гишүүн таван орон дээр нэмэх нь Герман гэх “5+1” бүлэг Ираний цөмийн хөтөлбөрийн асуудлаарх олон жил үргэлжилсэн хямралыг зохицуулах түүхэн шийдвэрт хүрсэн билээ. Энэ тохиролцооны дүнд бүхнийг хамарсан үйл ажиллагааны хамтарсан төлөвлөгөө боловсруулж, Иран улс цөмийн хөтөлбөрөө, тэр дотор уран байжуулах ажлаа хязгаарлах болж, үүний хариуд НҮБ-ын Аюулгүйн зөвлөл, АНУ болон Европын холбоо тус улсын эсрэг тогтоосон хориг арга хэмжээг цуцласан юм.