Филиппиний Ерөнхийлөгчийн хийж байгаа хар тамхины эсрэг тэмцэлд ард иргэдийн дийлэнх нь сэтгэл хангалуун байгаа тухай Филиппиний судалгааны байгууллагааас мэдээлж байна.

1200 гаруй хүнээс авсан энэ асуулгын дүн, цагдаа нар хүний аминд хоморголон хүрч байна гэдэг шалтгаанаар олон улсын шахалт дарамтад өртөж буй Филиппиний Засгийн газарт түлхэц өгч байна гэж Хятадын хэвлэлд бичсэн байна.

Учир нь судалгааны дүнг олон нийтэд танилцуулсны дараа Филиппиний Ерөнхийлөгчийн хэвлэлийн төлөөлөгч “Энэ судалгаа олон улсын хамтын нийгэмлэгийг буруу ойлголттой байгааг харуулж байна” гэж мэдэгдсэн байна.

Филиппиний төрийн бус байгууллагаас өнгөрөгч зургаадугаар сарын сүүлчээр явуулсан судалгаагаар хар тамхины эсрэг Дутертегийн санаачилсан гурван жилийн компанит ажлын хүрээнд Филиппинд хар тамхины хэрэглээ, гэмт хэрэг буурсан хэмээн 82 хувь нь сэтгэл хангалуун буюу маш сайн гэсэн үнэлгээ өгчээ.

Гэтэл “Хар тамхины худалдаа одоо цэцэглэн хөгжиж байгаа. Үүн дээр нэмээд цагдаа нар хүч хэрэглэх, хүний аминд хүрэх явдал хэт их байна” гэж санал асуулгад оролцсон хүмүүсийн 12 хувь нь таалагдахгүй байна гэж өгүүлсэн байна. Харин оролцогчдын 6 хувь нь Ерөнхийлөгчийнхөө хийсэн алхамд ямар үнэлгээ өгөхөө шийдээгүй байна.

Ийм судалгааны дүн гарахаас хоёр хоногийн өмнө Филиппиний Ерөнхийлөгч Родриго Дутерте төрийн өмчит байгууллагуудаа НҮБ-ын Хүний эрхийн хорооны 18 улсаас илгээх зээл тусламжийг авахгүй байх чиглэл бүхий тогтоол гаргасан байна. Энэ зуурт Филиппиний цагдаагийн байгууллагаас хар тамхи зуучилдаг байж болзошгүй 6700 гаруй хүний аминд хүрсэн гэдгээ мэдэгджээ.