Олон улсын атомын энергийн агентлагийн тэргүүн Рафаэль Гросси Ираныг цөмийн байгууламжууддаа хийх хяналт, шалгалтыг сэргээхийг уриаллаа.

Тэрбээр Тегеран тус агентлагтай дахин хамтран ажиллах нь маш чухал гэж 2026 оны зургаадугаар сарын 8-нд мэдэгдсэн байна. АНУ, Их Британи, Франц, Герман зэрэг улс Ираны бөмбөгдөлтөд өртсөн цөмийн байгууламжууд болон баяжуулсан ураны нөөцийн талаар тодорхой мэдээлэл өгөхийг шаардаж байна.

АНУ болон Израил өнгөрсөн онд Ираны цөмийн байгууламжуудад цохилт өгснөөс хойш тус агентлаг эдгээр газарт нэвтэрч чадаагүй байна. Мөн Тегеран тухайн байгууламжуудад хадгалагдаж байсан цөмийн материалын талаар тайлбар өгөөгүй байгаа аж.

ОУАЭА өмнө нь Иран 60 хувь хүртэл баяжуулсан 440 орчим килограмм урантай гэж тооцоолж байв. Энэ нь цөмийн зэвсэг үйлдвэрлэхэд шаардлагатай 90 хувийн түвшинд ойр үзүүлэлт юм. Харин Иран цөмийн хөтөлбөр нь зөвхөн иргэний зориулалттай гэж мэдэгдсээр байна.

Рафаэль Гросси Ираны удирдлагатай харилцах суваг тасарсан гэж мэдэгдээд, идэвхтэй бөмбөгдөлт, буудлагын үед шалгалт хийх боломжгүй ч яриа хэлэлцээг сэргээх нь хамгийн чухал гэж онцолжээ.