АНУ-ын төрийн тэргүүн Дональд Трамп өчигдөр "Цагаан ордон"-д Умард Солонгосын армын генерал Ким Ён Чолыг хүлээн авч уулзлаа. Уулзалтын дараа Ерөнхийлөгч Трамп энэ сарын 12-нд Сингапур улсад Умард Солонгосын удирдагч Ким Жон Унтай хийх дээд хэмжээний уулзалт товлосныхоо дагуу болно гэдгийг мэдэгдлээ.

Умард Солонгосын Хөдөлмөрийн намын орлогч дарга Ким Ён Чол тэргүүтэй төлөөлөгчид өнгөрсөн пүрэв гарагт АНУ-д айлчилж, хоёр орны удирдагч нарын дээд хэмжээний уулзалтын бэлтгэл ажлыг хангах хүрээнд уулзалт хэлэлцээр хийхээр ирсэн юм. Ким Ён Чол Умард Солонгосын талаас 2000 оноос хойш анх удаа АНУ-д айлчилж байгаа хамгийн өндөр албан тушаалтан болж байна.

Умардын удирдагч Ким Жон Ун, генерал Ким Ён Чолоор дамжуулж АНУ-ын төрийн тэргүүн Дональд Трампад хувийн захидал илгээсэн байна. Энэхүү захидлыг Ким Ён Чол Дональд Трамптай уулзах үеэрээ өөрийн биеэр гардуулж өгсөн юм.

Ерөнхийлөгч Трамп энэ захидлын тухай дэлгэрэнгүй мэдээллийг тун удахгүй олон нийтэд өгнө гэж хэлсэн байна. Уулзалтын үеэр талуудын хөндөн ярилцсан гол асуудал бол Солонгосын хойгийг цөмийн зэвсгээс ангижруулах асуудлын эргэн тойронд хэлэлцсэн сэдвүүд байжээ. Умард Солонгосын талаас ч энэ асуудалд нааштай байр суурь илэрхийлсэн учир Вашингтоны талаас уулзалтыг товлосон хугацаанд болно гэдгийг итгэлтэйгээр мэдэгдлээ гэж олон улсын хэвлэлүүд мэдээлж байна.