Сүүлийн үед АНУ, Умард Солонгосын хоёр дахь дээд хэмжээний уулзалт болно гэх өөдрөг зүйл их яригдах болсон ч АНУ-ын Төрийн нарийн бичгийн дарга Майк Помпео телевизийн “Фокс ньюс” сувагт өгсөн ярилцлагадаа “Дэлхий ертөнц дахин АНУ-ын Ерөнхийлөгч Дональд Трамп Умард Солонгосын удирдагч Ким Жон Ун-тай яриа хэлэлцээний ширээний ард суухыг хартал маш их зүйл хийх хэрэгтэй” гэлээ.

АНУ-ын Гадаад хэргийн сайдын хэлж байгаагаар, тэрбээр тун удахгүй дахин Пхеньянд зочлохоор зэхэж байгаа бөгөөд үүгээр хоёр орны удирдагчдын дараагийн уулзалтыг амжилттай болгох бэлтгэлийг хангах юм байна. Гэхдээ Майк Помпео, Пхеньян цөмийн зэвсгээсээ бүр мөсөн татгалзах хүртэл БНАСАУ-ын эсрэг тогтоосон олон улсын хориг арга хэмжээ хүчинтэй хэвээр байна гэдгийг санууллаа.

Умард болон Өмнөд Солонгосын удирдагч Ким Жон Ун, Мүн Жэ Ин нар энэ долоо хоногт Пхеньянд түүхэн уулзалт хийж, Пхеньяны тунхагт гарын үсэг зурсан. Энэ баримт бичигт "Хэрвээ АНУ хариу арга хэмжээ авбал, өөрөөр хэлбэл аюулгүй байдлын баталгаа өгвөл Умард Солонгос гадны ажиглагчдыг, мэргэжилтнүүдийг байлцуулан пуужингийн туршилтын талбайгаа хаахад, мөн цөмийн байгууламжаа нураахад бэлэн" гэдгээ илэрхийлсэн.