Израилийн Батлан хамгаалахын сайд Авигдор Либерман Газын зурваст  гал  зогсоох тухай  шийдвэртэй санал нийлэхгүй  байгаагаа илэрхийлэн албан тушаалаасаа огцрох хүсэлтээ  гаргасан  байна. Израиль  Палестины  тал 2014  оноос хойших хамгийн хурц мөргөлдөөн гарсны  дараа  гал  зогсоох  гэрээг өнгөрсөн  мягмар гаригт  байгуулсан юм.

Харин  Авигдор Либерман  Хамас  бүлэглэлийнхэнтэй  яриа хэлэлцээ хийж эвлэрэхээр  болсныг  террорист  халдлагад  бууж өгсөн хэрэг боллоо хэмээн  хэвлэлийн  бага хурал дээр  мэдэгдсэн  байна.  Израилийн төр  түр  хугацааны энх амгаланг  л  худалдаж  авлаа.  Энэ нь  үндэсний  аюулгүй  байдалд  урт  хугацаанд   хор  уршиг тарина хэмээн тэрээр  анхааруулсан байна. Түүгээр  ч зогсохгүй  Авигдор Либерманы  тэргүүлдэг  Манай  гэр Израиль  нам  Биньямин  Нетаньяхугийн  эвслийн засгийн газраас  гарах болно хэмээн тэрээр зарласан юм. 

Ийм алхам хийвэл  Ерөнхий сайд Нетаньяху парламентад  олонхийн дэмжлэгээ  алдахад  хүрэх  юм.  Мөн   Манай гэр Израиль намын тэргүүн Либерман   ээлжит бус сонгууль зарлахыг  уриалсан  байна.  Харин  Палестины   Хамас бүлэглэлийнхэн Либерманыг  Батлан хамгаалахын сайдын  албан  тушаалаасаа огцрохоор болсныг Газын зурвасынхны улс төрийн ялалт хэмээн тодорхойлж байна. Израилийн эрх баригчид  Палестины  дайчидтай   эвлэрэлийн гэрээ байгуулснаа зарласан юм.   Үүнээс өмнө   буюу  өнгөрсөн  даваа мягмар гаригт  Палестинчууд  Израилийн  нутаг дэвсгэр рүү нийтдээ  460 пуужин харвасан юм.

Харин Израилийн  цэргийнхэн үүнийх нь хариуд  Газын зурвас дахь  160  байд  цохилт өгсөн юм.   үүний уршгаар Израиль Палестины нийт 8 иргэн  амь насаа алдсан  юм.  Либерманы  тухайд  тэрээр  2016 онд  Израилийн батлан хамгаалахын  сайдын албыг хаших болсон.  Мөн  Нетаньяху Ерөнхий сайдын  өмнөх танхимд   гадаад хэргийн  сайдаар ажиллаж байсан юм.