АНУ-ын Флорида мужийн гүний усанд шумбагчид Зул сарын баярт зориулсан нэгэн шинэ үйлчилгээг эрхэлж байна. Тэд Санта Клаустай далайн гүнд хамтдаа шумбаж зургаа татуулах боломжийг сонирхсон хүн бүрт олгож байна.

Гэхдээ ийм өвөрмөц үйлчилгээнийхээ тусламжтайгаар олсон орлогоо тэд орон нутгийн хүүхдийн буяны байгууллагуудад хандивласан байна. Санта Клаус "Флорида Кис" далайн дархан цаазат газарт гүнийн усанд шумбаж хүмүүстэй зургаа даруулж байлаа. Гэхдээ далайн гүний Санта цаа бугатай чарганы оронд хоёр эвэртэй өвөрмөц шумбагч чарга хөллөжээ.

Британийн эрдэмтэд хүүхэд багачууд хэдэн насандаа Санта Клаус, Өвлийн өвөө гэж байдаг гэдэгт итгэхээ больдог талаар судалгаа хийсэн байна.

Эксетерийн хүрээлэнгийн энэ судалгаанд дэлхийн олон орны 1200 сайн дурынхан оролцжээ. Судалгааны дүнгээр таван насандаа хүүхдүүд Санта, Өвлийн өвгөн байдаг гэдэгт бүрэн итгэдэг болох нь тодорхой болсон байна.

Харин түүнээс хойш итгэл нь суларсаар 8-9 насандаа Санта Клаус, Өвлийн өвгөн гэж байдаггүй гэдэгт бүрэн итгэлтэй болсон байдаг байна. Түүнчлэн судалгаанд оролцогчдын гуравны нэг нь Өвлийн өвгөн, Санта Клаус гэж байдаггүйг мэдээд ихэд сэтгэл нь гутарч байснаа илэрхийлжээ. Тэдний 15 хувь нь хууртагдсан мэт, 10 хувь нь бүр уурлаж хилэгнэж байснаа ч илэрхийлжээ.