Энэ сарын 11-нд Бүгд найрамдах Македон улс сүүлийн 28 жилийн турш үргэлжилсэн дипломат маргааныг эцэслэх түүхэн шийдвэрийг гаргалаа. Энэ бол Македоны парламент улсынхаа нэрийг Умард Македоны бүгд найрамдах улс болгож өөрчлөх үндсэн хуулийн нэмэлт өөрчлөлтийг хэлэлцэн баталсан явдал байсан юм.

Ингэснээр, тус улс Европын холбоо болон НАТО-ын эгнээнд элсэхэд нэг шат ахилаа гэж олон улсын хэвлэлүүд мэдээлж байна. Өнгөрсөн 2018 оны 6-р сарын 17-нд, Македони болон Грекийн гадаад хэргийн сайд нар хоёр орныг заагладаг Преспа нуурын эрэг дээр хуучин Югославын бүгд найрамдах улсыг шинээр нэрлэх тухай тохиролцоонд гарын үсэг зурсан. Энэ тохиролцооны дагуу Македонийг Бүгд найрамдах Умард Македони гэж нэрлэхээр болсон юм. 1991  оныг  хүртэл  Македони  нь  Югославын  нэг хэсэг  байсан.  Харин  Югослав  улс задарч  бутрах үед  2 сая  гаруй хүн  амтай  бие даасан улс болж  улмаар  Македони  гэж  нэрийдэх болсон юм. 

Бүгд найрамдах Македони  улсыг  Балканы  биеэ  даасан  улс  хэмээн  дэлхийн  142 хүлээн зөвшөөрсөн байдаг. Харин  эрс эсэргүүцэж байсан улсын нэг нь   хөрш  Грек байсан юм.  Тэр  үеэс л  Македонид  орчин  үеийн   Македончууд  бол  Славянууд  биш харин  эртний Македонийн үр удам хэмээн  тунхаглаж  түүх  соёлын  өвөө  идэвхтэй эрэн  хайж эхэлсэн.  Харин  Грекчүүд  шинэ бүгд найрамдах улсын эрх баригчдыг соёлын өвийг нь хулгайлах гэлээ хэмээн  буруутгаж   улмаар  2008 онд  НАТО  Европын Холбооны эгнээнд элсэх  Македонийн  хүсэлтэд  хориг тавьж  улсынхаа нэрийг солихыг шаардаж байсан юм.