ОХУ болон АНУ-ын ерөнхийлөгч Владимир Путин, Дональд Трамп нар өнгөрсөн онд Буэнос-Айрес хотноо болсон “их 20”-ын дээд хэмжээний уулзалтын үеэр 15 минут орчим ярилцахдаа Америкийн талын орчуулагчгүй уулзсан байна. Энэ асуудлыг яагаад сөхөж байна вэ? гэвэл орчуулагч уулзалтаар юу ярьсан, ямар сэдэв хөндсөн талаар тэмдэглэл хийдэг юм байна. Британийн “Файнэншл таймс” сонин энэ тухай мэдээллээ.

Сонины авсан мэдээгээр, хоёр удирдагч Колон театрт болсон арга хэмжээнд оролцогчид тарж байх үеэр уулзсан, ерөнхийлөгч Трампыг зөвхөн эхнэр Меланья, харин Путиныг түүний орчуулагч нь дагалдан явж байжээ. Ингэснээр Америкийн талаас орчуулагч нь ч тэр, ерөнхийлөгчийн туслах нь ч тэр уулзалтад оролцоогүйгээс хоёр удирдагч уулзалтаар юу ярьсныг албан ёсоор нотлох, ямар нэгэн тэмдэглэл хөтөлсөн хүнгүй болж таарч байна. Оросын талын хэлснээр, хоёр удирдагч 15 минут орчим уулзаж, гадаад бодлогын зарим нэг асуудал, үүний дотор Азовын тэнгист болсон хэрэг явдал, Сирийн хямрал гэх асуудал хөнджээ.

Америкийн төрийн департамент болон Цагаан ордон Британийн сонинд тайлбар хийхээс татгалзсан байна. Трамп, Путин нар өнгөрсөн онд Хельсинкид уулзасны дараа Америкийн Ардчилсан намын гишүүд Орос, Америкийн удирдагчдын уулзалтад оролцсон Америкийн орчуулагчаас АНУ-ын Конгресст мэдүүлэг өгч, хоёр удирдагч яг юу ярьсан талаар дэлгэрэнгүй мэдээлэл өгөхийг шаардсан.

Үүний дараа Ардчилсан намынхан хоёр удирдагчийн нүүр тулсан өмнөх уулзалтуудад оролцсон орчуулагчдаас мэдүүлэг авахыг бас шаардсан байдаг. Цагаан ордны тэргүүнийг шүүмжлэгчид, Трамп Путинтэй хийсэн уулзалтаар ярьсан нарийн ширийн зүйлийг нууцалж байна хэмээн үздэг.