Францад “шар хантаазтан”-ууд эсэргүүцлээ үргэлжлүүлж, 15 дахь удаагийн давлагаа давлагааллаа. Тус улсын Дотоод яамны мэдээлснээр, энэ удаагийн эсэргүүцэлд улс орон даяар 46,6 мянган хүн оролцжээ. Бямба гарагийн эсэргүүцэл араасаа дахин эмх замбараагүй байдал дагуулсан байна.

Өнгөрсөн долоо хоногийн бямба гарагийн эсэргүүцэлд 41,5 мянган хүн оролцсон бол энэ удаагийнхад оролцогчдын тоо бага зэрэг өссөн байна. Парис хотод болсон жагсаалд 5,8 мянган хүн оролцож, нийгмийн сүлжээнд “шар цунами” гэх нэр аваад байгаа эсэргүүцэл цагдаа нар болон жагсагчид хооронд том мөргөлдөөн бололгүй өнгөрчээ. Гэсэн хэдий ч цагдаа нар жагсагчдыг тараахын тулд нулимс асгаруулагч хий хэрэглэхэд хүрсэн байна. Хууль сахиулах байгууллага 33 хүнийг саатуулж, 15-ыг нь баривчилсан байна.

Марсель, Лион, Бордод болсон жагсаал цуглаан эмх замбараагүй байдалд хүрэлгүй энхийн шинжтэй болсон тухай мэдээ ирж байна. Хэдийгээр “шар хантаазтан”-ын удирдагчид жил бүр зохион байгуулагддаг хөдөө аж ахуйн үзэсгэлэн худалдааны нээлтийн үеэр ерөнхийлөгч Эммануэль Макронтой уулзаж ярилцана гэж байсан ч тэд ирсэнгүй. “Шар хантаазтан”-уудын удирдагчдад зорьсондоо хүрэхэд юу саад болсон талаарх мэдээ алга байна. Харин ерөнхийлөгч Макрон өчигдөр үзэсгэлэн худалдааны нээлтэд оролцож, энд 12 цаг орчим өнгөрөөжээ. Тэрбээр хөдөө аж ахуйн салбарын төлөөлөгчидтэй уулзаж, тэдний тавьсан асуултад хариулж, тэдний өмнө тулгамдаж байгаа асуудалтай танилцаж, санал солилцсон байна.