Ливаний нийслэл Бейрут хотод болсон эсэргүүцлийн жагсаалын үеэр гарсан галын уршгаар гадаадын хоёр иргэн амь насаа алдсан байна. Энэ тухай Ливаний үндэсний мэдээллийн агентлаг дамжууллаа.

Энэ хэрэг эсэргүүцлийн томоохон жагсаал цуглаан болж байгаа газраас холгүйхэн гарчээ. Гал гарсан шалтгаан, амиа алдсан иргэд аль улсынх болох тухай мэдээлэл одоогоор алга байна.

Бейрут хотод олон мянган хүн эсэргүүцлийн жагсаалд нэгдэж Эвслийн засгийн газрын тэргүүн Саад Хариригийн татварын бодлогыг буруушааж байгаагаа илэрхийлцгээсэн юм. Жагсагчид хотын төв хэсгийн гол хорооллуудын замуудад хаалт хамгаалалт босгосон байлаа. Жагсагчид болон цагдаа нарын хооронд ширүүхэн мөргөлдөөн гарч нулимс асгаруулагч хий ашиглахад хүрсэн байна.

Ерөнхийлөгчийн Баабда ордонд болох сайд нарын танхимын хуралдаанаар 2020 оны санхүүгийн жилийн төсвийн төслийг батлах ёстой байсан ч олон нийт Ватсаппийн сарын татварыг 6 доллар болгож нэмэгдүүлэхээр төлөвлөснийг нь эрс эсэргүүцэн ийнхүү жагсч эхэлсэн байна. Хэдийгээр Холбоо харилцааны  сайд Мухаммед Шукир энэ төлөвлөгөөг цуцалж байгааг мэдэгдсэн ч эсэргүүцлийн ажиллагаа намжаагүй юм.