Өнгөрөгч ням гарагт АНУ-ын Нью-Йорк хотод төвтэй дэлхийн хүний эрхийн холбоо Хятадын Засгийн газар Түвдийн ард иргэдийн эрхийг хязгаарлаж байна гэж буруутгалаа. Тэдний хийсэн судалгаагаар одоогоос найман жилийн өмнө Түвдэд эрх чөлөөний бослого гарснаас хойш энэ бүс нутагт Түвд иргэдийн эрхийг хязгаарлаж, зөрчих явдал улам бүр газар авсан юм байна. 

Дэлхийн хүний эрхийн холбоо янз бүрийн эх сурвалжаас авсан 479 тохиолдлыг судалж үзсэний үр дүнд энэ дүгнэлтэд хүрсэн гэнэ. Тэд хийсэн судалгаа, гаргасан дүгнэлтээ олон нийтийн мэдээллийн хэрэгслээр дамжуулан ил гаргасан бөгөөд Хятадын Засгийн газар 2013 оноос эхлэн “Түвдийн хот, тосгодыг бүрэн хяналтандаа байлгах” хөтөлбөрийг хэрэгжүүлж эхэлсэн болохыг мэдэгдлээ.

Хятадын Засгийн газар өөрсдийн иргэдээ яс үндэс, гарал угсаагаар нь ялгаварлан гадуурхаж байгаа нь олон улсад хүлээн зөвшөөрөгдсөн хүний эрхийн бүхий л дүрэм, журмыг зөрчиж байгаа гэдгийг хүний эрхийн холбооныхон өөрийн тайландаа цохон тэмдэглэжээ. Мөн өөрийн нутагтаа амар тайван амьдарч чадахгүй байгаа Түвдийн ард иргэдийн асуудалд анхаарлаа хандуулахыг дэлхий дахинд уриалсан байна.

Харин өнөөдөр Хятадын Гадаад хэргийн яамны хэвлэл мэдээллийн албаны ажилтан Хуа Чун-Инг дэлхийн хүний эрхийн холбооны энэ тайланг үгүйсгэсэн мэдэгдэл хийлээ. Түүний мэдээлж байгаагаар Түвдэд хүний эрхийг зөрчиж, ялгаварлан гадуурхсан явдал огт байхгүй гэдгийг цохон тэмдэглээд Хятад улс өөрийн хязгаар бүс нутгаа хөгжүүлж буй асуудлыг улс төржүүлэхгүй байхыг хүссэн байна.

О.Хатанбаатар