Самсунг корпорацийн өв залгамжлагч Ли Жэёныг авлигын хэргээр энэ 7 хоногт дахин байцаахаар төлөвлөж байгаагаа Өмнөд Солонгосын тусгай прокурорынхон мэдэгдлээ. Өнгөрсөн нэгдүгээр сарын 19-нд Сөүл хотын төвийн дүүргийн шүүх Ли Жэёныг баривчилж байцаах тухай прокурорынхны хүсэлтийг цуцалсны дараагаар түүнийг дахин байцаалтад дуудсан байна. Самсунгийн гүйцэтгэх захиралд тулгаж байгаа авлигын хэрэг бол ерөнхийлөгч Пак Гын Хэ-гийн нэр холбогдсон Чой Сун Силын авлига, хээл хахуулийн хэргийн нэг хэсэг юм.

Тодруулбал, Ли Жэён 2015 онд өөрийн охин компаниудын нэгдлийг эрх баригчдаар хүлээн зөвшөөрүүлэхийн тулд Чой Сун Силийн байгуулсан 2 төрийн бус байгууллагад их хэмжээний мөнгө өгсөн. Энэ нь соёл урлаг, спортыг дэмжих зорилгоор өгсөн хандив гэж тэрээр тайлбарлаж байгаа ч прокурорынхон үүнийг авлига өгсөн хэрэг гэж сэрдэж байгаа юм.

Тусгай прокурорынхны мэдэгдсэнээр, Ли Жэёны авлигын хэрэгтэй холбоотой нэмэлт материалуудыг олж илрүүлсэн бөгөөд үүнтэй холбоотойгоор түүнээс нэмэлт байцаалт авах шаардлагатай гэж байгаа. Харин ажиглагчид тусгай прокурорынхон энэ удаагийн байцаалтаараа дамжуулан түүнийг баривчлах хүсэлтийг шүүхэд дахин гаргах байх гэж таамаглаж байна.