АНУ-ын Холбооны шүүх Хойд Америкийн уугуул омгийнхны Умард Дакотад газрын тосны хоолойн төгсгөл хэсгийг барих ажлыг хүчингүй болгох  шаардлага  бүхий гомдлыг няцаасан байна. Хоолойн барилгын ажлыг эрхэлж байгаа компани Миссури гол дээрх Оахе нуурын доогуур хонгил гаргах  зөвшөөрөл авсны дараа уугуул хоёр омгийн төлөөлөгчид Холбооны шүүхэд гомдол гаргасан юм. 

Сиу омгийн индианчууд энэ төсөл нуурын дэргэд шашны зан үйлээ хийхэд саад учруулна гэж баталсан байна. Уугуул омгийнхон шүүхийн шийдвэрт  сэтгэл нь гутарсан ч тэдний хувьд гэнэтийн шийдвэр биш байсныг сэтгүүлчдэд ярьсан байна.  

Дакота Аксесс байгалийн хийн хоолойг барих ажил өнгөрсөн оны 12 дугаар сард индианчуудын эсэргүүцлийн хөдөлгөөнөөс болоод зогсоход хүрсэн  юм. АНУ-ын эрх баригчид газрын тосны хоолойг тавих өөр чиглэл боловсруулахад бэлэн гэдгээ мэдэгдэж байсан. 

Гэвч  энэ оны нэгдүгээр сарын сүүлчээр АНУ-ын шинэ Ерөнхийлөгч Дональд Трамп Кистоун Икс Л,  Дакота  Аксесс газрын тосны хоолойнуудыг  барих  ажлыг хоёрдугаар сарын 7-ноос  эхлүүлэх  зарлиг гаргасан юм.  

Мөн өнгөрсөн 7-ны өдөр Америкийн арми газрын тосны Дакота Аксесс хоолойг барих зөвшөөрлийг өгч байгаагаа Конгресст мэдэгдсэн юм. Газрын тосны  энэ хоолой нь Умард  Дакотагоос  Иллинойс  хүртэл 1186 км-ийн урттай бөгөөд 3.7 тэрбум ам.долларын төсөвтэй юм байна.