Калифорн дахь хамгийн өндөр далан нурах аюул нүүрлээд байгаа учир үндэсний гвардын 23 мянган дайчныг байлдааны бэлэн байдалд оруулаад  байна. Энэ далан нурвал 125 тэрбум ам.долларын хор хохирол учруулсан Катрина хар салхиных шиг гамшиг дагуулна гэж мэргэжилтнүүд болгоомжилж  байгаа юм. 

Одоогоор Оровилл хот дахь далан нурж болзошгүй байна. Үүнтэй холбоотойгоор Калифорн мужийн захирагч Жерри Браун онц байдал тогтоогоод  байна.  Мөн Оровилл болон дагуул хот суурингуудын 183 мянган хүнийг нүүлгэн шилжүүлэх үүргийг өгчээ. Далангаар хашсан Оровиллын нуур 4.3 тэрбум куб метр  устай  бөгөөд  далан  сэтэрвэл  голын  эрэг дагуух  хот суурин  үерийн ноцтой гамшигт  өртөх аюул нүүрлээд  байна.

Гол асуудал нь далангийн эргэн тойрон дахь хөрс удаан хугацаагаар үргэлжилсэн борооны улмаас суларчихаад байна. Тиймээс хотын  эрх баригчид  даланг  бэхлэх  арга хэмжээ авч  байгаа ч үр дүнтэй эсэх нь одоогоор тодорхойгүй байна.  Мэргэжилтнүүд Шинэ Орлеанд Катрина хар салхины  уршгаар нүүрлэсэн үерийн гамшигтай  дүйхүйц гамшиг тохиож болзошгүйг анхааруулж байна.   

Оровиллын далан нь Калифорн мужийн Оровилл хотоос зүүн зүгт  Фетер  голын  эрэг дээр  байрладаг юм. Далангийн өндөр 235 метр бөгөөд 2110  метр урт. Америктаа хамгийн өндөр  даланд тооцогддог. Анх 1961 онд энэ даланг барьж эхэлсэн бөгөөд 1968 онд дууссан. Оровиллын хөндийг байнга үерт  автахаас сэргийлж энэ даланг барьсан юм байна.