Канад улс "Исламын улс" бүлэглэлийн хохирогч болсон 1200  дүрвэгчийг  түүний дотор Арабын угсаатны шашны цөөнх болох езидүүдийг хүлээн  авахаа  мэдэгдлээ. Энэ тухай Канадын цагаачлал, иргэншил, дүрвэгсдийн асуудал эрхэлсэн яамны сайд Ахмед  Хусен  мэдэгдсэн  юм. Канадын Засгийн газар  илүү эрсдэлтэй нөхцөлд байгаа  дүрвэгсдийг  хүлээн авч, Канадад  орон байртай  болж шинэ  амьдрал  эхлэх  боломжийг  нь  олгох  болно гэж тэрээр онцлон мэдэгдсэн  юм.

Канадад амьдрах  эрх  олгох  дүрвэгсдийг  сонгохдоо тус улс НҮБ-тай хамтран ажиллах юм байна. Цагаачлалын албаны офицерүүд дүрвэгч нэг бүртэй  ярилцаж, аюулгүй  байдлын  болон биометрийн шалгалтад хамруулан, эрүүл мэндийн шинжилгээ үзлэгт ч хамруулах юм байна. Канадын тал  төдийгүй НҮБ ч дүрвэгсдийг шашны  болон  угсаа гарлаар  ялгаж  сонгохгүй ч  энэ  жил хүлээн авах  1200  хүний  ихэнхийг нь  езидүүдээс сонгох  болно гэж мэдэгдэж байна.  

Дүрвэгсдийг хүлээн авах энэ хөтөлбөрт Канад улс нийтдээ 28 сая ам.доллар зарцуулах юм байна. Өөрөөр хэлбэл, дүрвэгч тус бүрт 23 мянган  ам.доллар зарцуулах юм.  НҮБ "Исламын улс" бүлэглэлийнхний эртний езид үндэстний эсрэг үйлдэж буй гэмт хэргийг хоморголон устгалт хийнэ гэж тодорхойлсон  бөгөөд дэлхийн улс орнуудад  хандаж  тэдэнд  тусламж  дэмжлэг  үзүүлэхийг уриалсан юм. 

Канад улс үндэсний энэ цөөнхийн дүрвэгсдийг  хүлээн авахаа албан ёсоор илэрхийлсэн анхны орон болоод байна. Гэхдээ үүнээс өмнө  тус улс   нийт  400 езидийг хүлээн  аваад  байгаа юм.