Мэдээллийн технологийн хүчээр хүн төрөлхтөн хүссэнээ бүтээж, ажил амьдралаа хялбаршуулж байгаагийн нэг тод илрэл нь онлайн худалдаа. Тэгвэл энэ салбарт онлайн худалдааны “Их дэлгүүр” гэгдэх “Amazon” компани тэргүүлэх байр суурийг эзэлдэг. Анх 1994 онд онлайнаар ном борлуулан ажлын гараагаа эхэлж байсан "Амазон" өнгөрөгч 2015 онд анх биет номын дэлгүүрээ өөрийн төрөлх Сиаттл хотод нээж байсан. Харин энэ удаад тус компани өөрийн анхны биет хүнсний дэлгүүрээ нээх төлөвлөгөөтэй ажиллаж байна. Энэ нь зүгээр ч нэг хүнсний дэлгүүр биш, худалдан авагчид энэхүү дэлгүүрээр үйлчлүүлснийхээ төлөө төлбөрийн ямар нэг процесс хийх шаардлагагүй юм.

Энэ бол Амазоны бас нэг төрлийн технологийн дэвшлийг ашиглан зохион бүтээсэн шинэ инноваци. Худалдан авагчид энэхүү дэлгүүрээр үйлчлүүлэхийн тулд Амазоны зохион бүтээсэн ухаалаг гар утасны аппликейшныг татаж утсандаа суулгасан байна. Худалдан авагч дэлгүүрт орохдоо аппликешнээ асааж, дэлгүүрт уншуулан, нэвтрэн орно.

Хэрэглэгч дэлгүүрт бараагаа сонгон сагсанд хийх бүрт систем ажиллаж, худалдан авч буй бүтээгдэхүүний жагсаалтыг утсанд харуулна. Харин тухайн нэг барааг буцаах нөхцөлд систем илрүүлж, хэрэглэгчийн худалдан авч буй барааны жагсаалтаас хасах жишээтэй. Хэрэглэгч худалдан авалт хийж дэлгүүрээс гармагц "Амазон" таны авсан зүйлсийн жагсаалтыг үнийн дүнтэй нь бодон, гар утсан дээр тань харуулах болно. Өөрөөр хэлбэл, хэрэглэгч энэ дэлгүүрээр дараа төлбөрт хэлбэрээр үйлчлүүлж байна гэсэн үг юм. Тус компани энэхүү системийг хөгжүүлэхийн тулд сүүлийн дөрвөн жил тасралтгүй ажилласны эцэст энэ оны эхээр уг дэлгүүрээ нээх юм.

Гэвч ийм дараа төлбөрт хэлбэрийн дэлгүүр нээх нь анхны шинэ санаа биш байлаа. Учир нь 2013 онд "Тесла" ийм төрлийн дэлгүүр нээсэн хэдий ч амжилтад хүрэлгүй, эцэстээ үүдээ барьж байсан юм. Сүүлийн хэдэн жилд "Амазон" маш хурдацтай өссөн. 150 мянга гаруй ажилтантай, дэлхийн 15 оронд үйл ажиллагаа явуулдаг.

АНУ-ын зах зээл дээр гэхэд 200 гаруй сая нэрийн бараа бүтээгдэхүүнийг өөрийнхөө цахимаар зарж борлуулдаг. Түүнчлэн АНУ-ын “Fortune 500” компанийн жагсаалтын 29 дүгээрт бичигдэж байна.