Их Британийн парламент 152 мянган хүн гарын үсгээ зурсан өргөх бичгийг хэлэлцэж байна. Өнгөрсөн оны тавдугаар сараас гарын үсэг цуглуулж  эхэлсэн энэхүү өргөх бичгийг Лондон дахь олон улсын "ПИ ВИ СИ" компанид ажилладаг 27 настай Никола Торп гэдэг  бүсгүй санаачилсан юм. Торп  бүсгүй  2015  оны 12 дугаар сард ажилдаа  өндөр  өсгийтэй гуталгүй  ирсэн байсан тул түүнд ажлаас гарахыг санал  болгосон  байна. 

Дарга нь түүнд өндөр өсгийтэй  хэд хэдэн хос гутал  авахыг  шаардсан  ч  Торп  биелүүлэхээс  татгалзсан  байна.  Үүнээсээ болоод  тэрбээр ажлаасаа  халагдсан  бөгөөд  энэ  дүрэм журмыг  эсэргүүцэн иргэдийн гарын  үсгийг  цуглуулах  аян  өрнүүлсэн  байна.  Парламентын  өргөх бичиг  хариуцсан  хороо энэ асуудлыг  өнгөрсөн оны зургаадугаар сараас судалж, шалгаж эхэлсэн бөгөөд Засгийн газарт хандаж шаардлага гарсан тохиолдолд хуульд өөрчлөлт оруулах асуудлыг хэлэлцэхийг уриалсан юм. 

Охид  бүсгүйчүүд ажил дээрээ удаан хугацаагаар өндөр өсгийтэй гутал  өмссөнөөс болж  хөл  нь  их  өвддөг,  дээр нь зарим  албан  газар,  аж ахуйн нэгжүүд үсээ  цайвар өнгөөр будах,  нүүрээ  байнга  будаж  байх зэрэг  шаардлагууд  тавьдаг  гэдэг  гомдол гаргах  болсон  байна. Өргөх бичиг  хариуцсан хорооныхон өнгөрсөн нэгдүгээр сард гаргасан тайландаа  энэ тухай тодорхой  тэмдэглэсэн байсан бөгөөд  парламентаар  энэ асуудлыг  хэлэлцэх нь зөв  гэж үзсэн юм.