Японы "Эн Эйч Кэй"  теле суваг АНУ-ын Төрийн нарийн бичгийн дарга Рекс Тиллерсон, Японы Гадаад хэргийн сайд Фумио Кисида нарын Токио  хотноо  өнөөдөр болох уулзалт хэлэлцээг онцлон мэдээлж байна.

АНУ-ын Төрийн нарийн бичгийн дарга Рекс Тиллерсон хилийн чинад дахь анхны айлчлалаа Япон улсаас эхэллээ. Мөн Өмнөд Солонгос, БНХАУ-д айлчлахаар төлөвлөж байгааг нь мэдээлэв. 

Харин Япон, АНУ-ын Гадаад хэргийн сайд нарын уулзалтаар Умард Солонгосын цөмийн болон пуужингийн хөтөлбөрийн талаар хөндөж хэлэлцэхээр  төлөвлөж байгааг тэмдэглэсэн байна. Тодруулбал, хоёр сайд энэ асуудлаарх Япон, АНУ, Өмнөд Солонгосын хамтын  ажиллагааг  идэвхжүүлэх талаар  тохиролцох байх гэж таамаглаж байна.

Мөн АНУ-ын Төрийн нарийн бичгийн дарга Тиллерсоныг Умард Солонгостой холбоотой АНУ-ын байр суурийг тодорхой илэрхийлнэ гэдэгт итгэлтэй  байна. Түүнчлэн  энэ  уулзалтаар Өмнөд болон Зүүн Хятадын тэнгисийг тойрсон  асуудлыг ч хэлэлцэхээр төлөвлөсөн байна. Харин хоёр улсын эдийн засгийн бодлого, түүний дотор Курилын арлууд, Орос, Японы энхийн хэлэлцээтэй холбоотой ОХУ-тай байгуулах хамтын ажиллагааны гэрээний  талаар хөндөж хэлэлцэхээр байна гэж "Эн Эйч Кэй" мэдээлж байна.