Их Британийн “Хайбрид Эйр Вехиклс” компани агаарын тээврийн салбарт хувьсгал авчирна гэгдэж байгаа “Эйрлендер 10” нисдэг хөлгийг өнгөрөгч 2016 онд анх бүтээжээ.

“Эйрлендер 10”-ыг агаарын хөлөг, нисдэг тэрэг болон нисдэг онгоцны шилмэл чанаруудыг хослуулсан загвараар зохион бүтээсэн байна. Энэ нисэх онгоцны их бие 92 метр урттай нь одоо ашиглагдаж байгаа хамгийн урт их биетэй нисэх онгоцныхоос даруй 18 метр илүү урт гэсэн үг. Энэ үзүүлэлтээрээ тус нисэх онгоц дэлхийн хамгийн урт, мөн хамгийн том нисэх онгоцоор зүй ёсоор тодроод байна. “Эйрлендер 10” дөрвөн хөдөлгүүртэй.

Мөн 6100 метрийн өндөрт хөөрч, цагт 148 км хурдлах хүчин чадалтай юм байна. Нисэх онгоцноос ялгаатай нь “Эйрлендер 10” заавал тусгай нисэх зурвас гэлтгүй ямар ч төрлийн гадарга, тэр дундаа усан дээр саадгүй газардах боломжтой юм байна. Учир нь энэ хөлгийг агаараас хөнгөн хий болох гелигээр, хөлгийн гадна хэсгийг нэг сая шоо метр гелигээр дүүргэсэн байгаа юм. “Эйрлендер 10” 48 зорчигч суулгах, 10 тонн ачаа тээвэрлэн цагт 148 км хурдтайгаар тав хоног зогсолтгүй нислэг үйлдэх хүчин чадалтай юм байна.

Энэ шинж чанараараа тус агаарын хөлөг хүрч очиход хүндрэл бэрхшээлтэй бүс нутагт ачаа бараа тээвэрлэхэд хамгийн тохиромжтой гэж үйлдвэрлэгчид нь онцолж байна. Тус нисдэг хөлөг 200 цаг туршилтаар ниссэний дараа арилжааны нислэг үйлдэх боломж нээгдэх байсан. Гэвч энэ долоо хоногийн эхээр явагдсан хоёр дахь удаагийн томоохон туршилтын нислэг амжилтгүй болсон байна. 

Агаарт 20 минутын турш нислэг үйлдэж байгаад өндрөө алдаж улмаар газарджээ. Газардах үедээ хөлгийн бүхээгт нилээдгүй гэмтэл үүссэн байна. Компанийн зүгээс осолдсон шалтгааныг тодорхой хэлж мэдэхгүй байгаа учраас ослын шалтгааныг тогтоохоор ажиллаж эхэлжээ.