Ариутгах, халдваргүйжүүлэх, үнэр дарах  химийн  бодистой их харьцдаг хүмүүс бамбай булчирхайн хорт хавдартай болох магадлал энгийн хүмүүстэй харьцуулахад 65 хувиар илүү байна. 

АНУ-ын Коннектикут мужийн Иелийн их сургуулийн доктор Явей Жанг ажил мэргэжлийн онцлог, пестицид болон бамбай булчирхайн хорт хавдар хоорондын хамаарлыг судалсан судалгааны дүнгээ танилцуулжээ. Гэхдээ ийм төрлийн судалгаа цөөнхөн байдгийг тэрбээр онцолж байна.

Судалгааны үр дүнд  химийн бодисонд агуулагддаг биоцид хэмээх бодистой ажил мэргэжлийн онцлогоор их харьцдаг хүмүүс бамбай булчирхайн хорт хавдар өвчнөөр өвчлөх магадлал хоёр дахин өсдөг. Мөн эмэгтэйчүүд эрэгтэй хүмүүсийг бодвол бамбай булчирхайн өвчлөлд илүү өртөмтгий, мөн бамбайн булчирхайн хавдар нь цагаан арьст хүмүүсийн дунд илүү тохиолддог судалгааны дүн гарсан байна.

Шинжээчид 2010 онд судалгаанд оролцсон 462 насанд хүрсэн, бамбай булчирхайн хавдартай хүний мэдээллийг 2011 онд судалгаанд оролцсон бамбай булчирхайн ямар нэг өвчлөлгүй 498 нас, хүйс ойролцоо хүмүүсийн мэдээлэлтэй харьцуулжээ. Судалгааны дүнгээс харахад эмнэлэг, цэвэрлэгээ ариутгалын ажил эрхэлдэг эмнэлгийн асрагч, барилгын цэвэрлэгчид, гэрийн үйлчлэгч зэрэг хүмүүс нь биоцид бодистой их харьцдаг гэж гарсан байна.

Хэдийгээр одоогийн байдлаар биоцид болон бамбайн хавдрын шууд хамаарлыг олоогүй хэдий ч цэвэрлэгээний бодист агуулагддаг триклозан нь бодисын солилцоо, өсөлтөд оролцдог гормоны хэмжээг бууруулж, булчирхайн гормонд өөрчлөлт оруулдаг байж болзошгүй гэдгийг эрдэмтэд хэллээ.