Английн алдарт зохиолч, сэтгүүлч Даниэл Дефогийн хамгийн алдартай бүтээлүүдийн нэг "Робинзон Крузо" роман Их Британийн нийслэл Лондон хотноо 1719 оны энэ өдөр анх удаа хэвлэгдэн гарчээ. Дэлхийн сонгодог утга зохиолын түүхийн хамгийн шилдэг бүтээлүүдийн нэг болсон уг роман нь нэгэн далайчин эр эзгүй арал дээр ганцаараа амьдарч, өөрийн вант улсыг бүтээн босож буй тухай өгүүлдэг. 

Роман тухайн үед "Йоркийн далайчин Робинзон Крузогийн амьдрал ба ер бусын адал явдал" нэртэйгээр хэвлэгдэж байжээ. Хэвлэгдсэн даруйдаа, уншигч олны талархлыг хүлээж, гурван сарын дотор 4 удаа хэвлэгдэж, шуугиан тарьж байсан энэ ном дэлхийн бараг бүх хэлнээ орчуулагдсан гэдэг.

Даниел Дефо нь 71 наслахдаа улс төр, эдийн засаг, далайн аялал зэрэг олон төрөл зүйлээр нийт 250 гаруй зохиол бүтээл бичиж туурвисан бөгөөд энэ зохиолч хэзээ ч жуулчин байгаагүй гэдэг. Харин бараг 60 насныхаа босгон дээр сонгодог утга зохиолын түүхэнд "Робинзон Крузо" хэмээх алдарт бүтээлээ туурвиж, дэлхийд алдар нэрээ цуурайтуулсан юм.