АНУ-ын төлөөлөгчдийн танхим Умард Солонгосын эсрэг илүү хатуу хориг арга хэмжээ тогтоох тухай хуулийн төслийг санал нэгтэйгээр дэмжлээ. Ингэснээр Умард Солонгостой харилцаа холбоотой ажилладаг гадны иргэд болон аж ахуй нэгжүүдэд засгийн газар нь хориг арга хэмжээ тогтоох боломжтой болж байна. Өөрөөр хэлбэл Умардтай хамтарч үйл ажиллагаа явуулдаг АНУ-ын бус гадны иргэн, аж ахуй нэгжүүдийг хориг арга хэмжээнд оруулахаар Вашингтон хуульчлах гэж аж.

Энэ хуулийн төслийг Умард Солонгосын цөмйин болон пуужингийн хөтөлбөрийн санхүүжилтын эх үүсвэрийг таслах зорилготой юм. Хориг арга хэмжээнд, Умард Солонгосын ажилчдыг ажилд авч, тэднийг ажиллах хүч болгон ашигладаг байгууллага, мөн Умардаас хөдөө аж ахуйн гаралтай бүтээгдэхүүн болон ашигт малтмал их хэмжээгээр импортлодог хувь хүн, аж ахуй нэгжийг хамруулах нь.

Энэ хуулийн төсөл дээр хамтран ажилласан конгрессын гадаад хэргийн хорооны дарга Эд Ройс уг хуулийн төслийн ач холбогдлыг тайлбарлахдаа, Умард Солонгосын цөмийн болон пуужингийн хөтөлбөрийг зогсоох, нөгөө талаар НҮБ-ын аюулгүйн Зөвлөлийн хориг арга хэмжээ авах тухай тогтоолуудыг хэрэгжүүлэх зорилгоор нэмэлт хориг тавихаар хуулийн төсөл боловсруулснаа онцолсон байна.

Мөн тэрээр бүх улс орнууд тэр дундаа БНХАУ олон улсын эдгээр үүрэг амлалтыг хүндэтгэн биелүүлэх үүрэг хүлээж байгааг ч онцоллоо. Тэрээр гадны банк, компаниуд тэр дундаа   БНХАУ-ын аж ахуй нэгжүүд Умард Солонгосын дэглэмтэй эсвэл АНУ-ын аль нэгтэй нь бизнес хийх эсэхээ сонгох хэрэгтэй, энэ бол Трампын засаг захиргааны гол ач холбогдол өгч байгаа асуудал шүү гэдгийг тайлбарлалаа. Одоо дээрх хуулийн төслийг АНУ-ын сенатын танхимаар хэлэлцүүлж, эцсийн баталгааг авах ёстой юм байна.