Хоригдсон таван иргэн Чеченьд ижил хүйстэн эрэгтэйчүүдийг эрүүдэн шүүж, шахаж хавчиж байгааг шалгаж өгөхийг хүссэн өргөдөл гаргахаар зэхэж байжээ. Тэднийг цагдаа нар ерөнхий прокурорд өргөдлөө өгөхөөр Москва хотын метроны төв буудалд цугларч байхад нь “зөвшөөрөлгүйгээр эсэргүүцлийн ажиллагаа явуулах гэж байсан” гэх үндэслэлээр баривчилсан гэж "Евроньюс" мэдээлж байна.

Тус агентлагийн мэдээлснээр "Цагдаа нар Оросын төдийгүй олон улсын хууль дүрмээр баталгаажсан гомдол гаргах эрхийг зөрчиж байна” гэж идэвхтэй эсэргүүцэгчдийн нэг нь ярьжээ.

Чеченьд ижил хүйстэн эрэгтэйчүүдийн эсрэг шийдвэртэй арга хэмжээ явуулж байгаа талаар анх Оросын “Новая газета” сонин мэдээлж байсан байна. Сонины өгүүлэлд 100-аад ийм эрэгтэй байдаг гэж тоймлосон байна. Энэ мэдээлэл гарсны дараа асуудлыг Кремлийн түвшинд авч хэлэлцсэн ч “ижил хүйстнүүдийг эрүүдэн шүүж байгаа гэх нотолгоо олдоогүй” гэж Путины хэвлэлийн төлөөлөгч мэдэгдэж байжээ.

Өнгөрөгч долоо хоногт Германы канцлер Ангела Меркел ОХУ-д айлчлал хийх үеэрээ Чеченьд болж байгаа үйл явдалд анхаарал хандуулж, дахин хүчирхийлэл гаргахгүй байхад анхаарахыг ОХУ-ын Ерөнхийлөгчөөс хүсч байсныг "ВВС" сануулж байна.