Мэргэлжлйн сүмо бөхийн Хацү башёгийн 12 дахь өдрийн барилдаанд их аварга Хакүхо М.Даваажаргал, сэкивакэ Тамаваши Б.Мөнх-Оргил нар оноолт таараад байсан бөгөөд барилдаан Тамавашигийн ялалтаар өндөрлөлөө. Ингэснээр хоёр бөхийн даваа адил 10 болж, тэргүүлэгчийн эгнээнд зэрэгцэж ирлээ.

Их аварга Хакүхо уржигдарийн барилдаанд комосүби Митакимүд ялагдсан бол өчигдөр Тамаваши Б.Мөнх-Оргилд дийлдлээ. Япон бөхчүүдээс озэки Такаясү долоо дахь даваагаа авсан бөгөөд тавин хувийн амжилтаа үзүүлэхэд ганцхан даваа үлдлээ.

Манай бөхчүүдээс Ичиножёо А.Ичинноров Хокүтофүжид ялагдаж, үлдсэн гурван өдрийн барилдааны хоёрт нь заавал ялах даалгавартай үлдлээ. Мөн Чиёошома Г.Мөнхсайхан мөн Асаноямад ялагдаж, үлдсэн барилдаанд унах эрхгүй болж байна. Тодруулбал, Ичиножёо зургаа, Чиёошома таван даваатай болсон юм.

Хацү башёг их аварга Хакүхо М.Даваажаргал, сэкивакэ Тамаваши Б.Мөнх-Оргил нар 10 даваа, хоёр унаатай тэргүүлж эхэлсэн бол тэдний араас Такакейшо, Кайсэй нар есөн даваа, гурван унаатай нэхэж явна.

Токио хотод болж буй Хацү башёгийн 13 дахь өдөр буюу өнөөдөр их аварга Хакүхо Такакэйшотой, Тамаваши Б.Мөнх-Оргил Хокүтофүжитэй барилдахаар оноолт таарчээ. Харин Япон озэки /арслан/ цолтнууд болох Такаясү /7-5/, Гоэйдо /6-6/ нар хоорондоо таарсан юм.