“Буур” хэмээн олноо алдаршсан, Монгол Улсын гавьяат тамирчин, даян аварга Н.Жамъян агсны 120 жилийн ойд зориулсан Монгол Улсын аварга цолны хүндэтгэлийн барилдаан өчигдөр Монгол бөхийн өргөөнд боллоо.

Уг барилдаанд 256 хүчтэн зодоглосноос Хэнтий аймгийн Өмнөдэлгэр сумын харьяат, Монгол Улсын арслан Э.Оюунболд түрүүлж, Дорнод аймгийн Дашбалбар сумын харьяат, улсын начин Д.Анар үзүүрлэв.

Их шөвөгт Архангай аймгийн Эрдэнэбулган сумын харьяат, улсын арслан Р.Пүрэвдагва, Хэнтийн аймгийн Дэлгэрхаан сумын харьяат аймгийн арслан Д.Аззаяа шалгарсан юм.

“Буур” Н.Жамъян аваргын үр хүүхэд, ач, зээ нь МҮБХ-той хамтран зохион байгуулсөн бөгөөд түрүү бөх тав, үзүүрлэсэн бөх хоёр сая төгрөг гардсан юм.

Сонирхуулахад, Нацагийн Жамъян нь 1899 онд Архангай аймгийн Цахир сум (хуучнаар Сайн Ноён Хан аймгийн Далай Чойнхор вангийн хошуу)-нд төржээ.

Амжилт

1925 онд 9 давж үзүүрлэн улсын арслан цол хүртэв

1926 онд 10 давж түрүүлэн улсын аварга цолтой болов

1927 онд мөн 10 давж түрүүлэхэд даян аварга цол хүртээжээ

1928 онд 7 давсан

1934 онд 7 давсан

1937 онд 6 давсан

1939 онд 5 давсан

1940 онд 7 давсан

1941 онд 7 давсан

1942 онд 7 давсан

1946 онд 5 давж шөвгөрчээ

Тэрээр 20 орчим настайдаа тэмээгээр Алшаа руу жин тээж байх үед нь гүүрний мод цөмөрч, жингийн сүүлд явсан бууран тайлаг доош унах шахжээ. Тэгэхэд нь Н.Жамъян агсан уг буурны бөгсөн талаас өргөн гаргаснаас хойш түүнийг "Буур" хэмээн нэрийддэг болсон түүхтэй. Түүний зээ хүү өдгөө “Алдар” спорт хорооны даргаар ажиллаж буй, Монгол Улсын гавьяат тамирчин, дархан аварга Г.Өсөхбаяр бол Г.Өсөхбаярын дүү Г.Батбаяр нь улсын харцага цолтой билээ. Харин Г.Батбаярын хүү мэргэжлийн сүмогоор хүч үзэж байна.