Нийслэл Улаанбаатар хотын 380 жилийн ойд зориулсан улс, аймгийн алдар цолтой 256 бөхийн барилдаан Монгол бөхийн өргөөнд үргэлжилж байна.

Уг барилдааны гурвын даваанд Монгол Улсын арслан П.Бүрэнтөгс аймгийн арслан Д.Цогтбаатарт өвдөг шороодлоо.  

Цар хүрээ, нэр хүндийн хувьд улсын баяр наадам, сар шинийн дараа орохуйц байсан энэхүү барилдаанд дархан аварга Б.Бат-Эрдэнэ, А.Сүхбат, улсын аварга Д.Сумьяабазар, Ч.Санжаадамба, Г.Эрхэмбаяр, улсын арслан Д.Ганхуяг, Б.Ганбат, Ц.Содномдорж, Р.Пүрэвдагва, улсын гардь Д.Рагчаа, И.Доржсамбуу нарын зэрэг бөх түрүүлж байжээ.

Мөн дархан аварга Г.Өсөхбаяр, улсын аварга Н.Батсуурь, улсын арслан Х.Мөнхбаатар, Д.Азжаргал, Д.Мөнх-Эрдэнэ нар үзүүрлэж байсан нь барилдааны цар хүрээг харуулж байна.

2011 оныг хүртэл жил бүр зохион байгуулж байсан уг барилдааныг 2014 онд дахин нэг удаа зохион байгуулсан бөгөөд сүүлийн жилүүдэд өнжсөн юм. Харин өнөө жил 380 жилийн тэгш ойг тохиолдуулан зохиохоор болоод байгаа юм.

Сонирхуулахад, уг барилдааныг МҮОНРТ орон даяар шууд дамжуулж байна.