Японы мэргэжлийн сүмо бөхийн шинэ оны анхны тэмцээн “Хачү” башё Токио хотын сүмогийн ордонд өнгөрсөн ням гарагт эхэлсэн билээ.

Энэ удаагийн башёд аваргуудаар манлайлуулсан Монголын 23 сүмоч таван зиндаанд барилдсан ч их аварга Хакүхо М.Даваажаргал өнөөдөр уг тэмцээнийг орхих шийдвэр гаргав.

Учир нь хоёр дахь өдрийн барилдаанаа Маэгашира Эндотой хийхдээ баруун хөлөндөө гэмтэл авсан нь ийм шийдвэр гаргахад хүргэсэн байна. Мөн өчигдөр орой маш хүнд халуурч хоносон нь үргэлжлүүлж барилдах боломжгүй болгожээ.

Тэрбээр нэг даваа хоёр унаатай байсан бөгөөд өнөөдөр Хокүтофүжитой хүч үзэх байсан ч өрсөлдөгч нь нэг сул даваатай болох нь тодорхой боллоо.