Монгол Улсын аварга Н.Батсуурь, Ч.Санжаадамба, улсын арслан Ц.Содномдорж, улсын гарьд Б.Гончигдамба, Ж.Бат-Эрдэнэ, улсын заан Д.Баасандорж, Б.Батмөнх улсын харцага Н.Батзаяа, О.Хангай, М.Бадарч, Д.Анар, улсын өсөх идэр начин Ч.Хөхчирэнгэр, улсын начин Б.Орхонбаяр тэргүүтэй бөхчүүд өнөөдөр “Монгол нюс”-д хэвлэлийн бага хурал хийв.

Тэдний зорилго нь МҮБХ-ны “Их эе” болон цэцдийн зөвлөлийн хурлын ирэх хоёрдугаар сарын 10-наас өмнө зохион байгуулахыг шаардлаа.

Мөн баяр наадмын тухай хууль 2003 оноос хойш шинэчлэгдээгүй тул уг хуулиа шинэчлэхийн төлөө Монголын үндэсний бөхийн холбоо санаачлагатай ажиллах хэрэгтэй гэлээ.  

Цэцдийн зөвлөлийн хурал нь жилд нэг удаа хуралдах ёстой. Шаардлагатай бол нэмэлт хуралдана гэсэн заалттай байдаг. Гэтэл 2018 оны гуравдугаар сарын 24-нөөс хойш нэг ч удаа хуралдаагүй гэдгийг тэд мэдэгдсэн юм.

МҮБХ хэрвээ ирэх хоёрдугаар сарын 10-наас өмнө хуралдахгүй бол цагаан сарын барилдаанд бүгдээрээ зодоглохгүй гэв.

Энэ удаагийн хуралд Монгол Улсын аварга С.Мөнхбат, улсын арслан П.Бүрэнтөгс нар ирж амжаагүй ч санал нэгтэй байгаа гэдгээ дамжуулсан юм.

Түүнчлэн сошиалаар сэргээштэй холбоотой гэсэн 30 гаруй байгаа бол ойрын хугацаанд олон нийтэд зарлахыг шаардаж байв.

Хурлын дараа тэд МҮБХ-ны тэргүүн, дархан аварга Б.Бат-Эрдэнэ, цэцдийн зөвлөлийн дарга, дархан аварга Г.Өсөхбаяр нарт мэдэгдэл хүргүүлнэ гэсэн юм.