АНУ-ын тэнгисийн цэргийн хүчний “Стэтхем” байлдааны хөлөг онгоц Өмнөд Хятадын тэнгис дэх маргаантай аралд ойртож очсон байна. Параселийн арлуудын бүсэд оршдог тус аралтай холбоотой асуудлаар БНХАУ, Вьетнам болон Тайвань улсын удирдлагууд тус аралыг өөрсдийн мэдэлдээ авахаар булаацалдаж байгаа юм. АНУ-ын байлдааны хөлөг онгоц ойртож очсон байгалийн хийн нөөцтэй тус арал дээр БНХАУ 1974 оноос хойш хяналтаа тогтоосон юм байна.

Өмнөд Хятадын тэнгис дэх Параселийн арлуудын маргаантай бүсэд оршдог Трайтон аралд АНУ-ын тэнгисийн цэргийн хүчний “Стэтхем” хөлөг онгоц 12 миль буюу 22.2 км зайд ойртож очсон юм байна. Үүнийг БНХАУ цэргийн болон улс төрийн зорилготой өдөөн хатгасан ноцтой үйлдэл гэж АНУ-ыг буруутгасан байна.

Үүнтэй холбогдуулан БНХАУ-ын эрх баригчид Үндэсний аюулгүй байдлыг хангах, тусгаар тогтнолыг хамгаалахын тулд шаардлагатай бүхий л арга хэмжээг авах болно гэдгээ мэдэгдсэн байна. Өмнөд Хятадын Тэнгис дэх өргөн уудам бүс нутгийн ихэнх хэсэг нь Бээжингийн хяналтад байдаг. Харин Азийн бусад улс орнуудын хувьд буюу Филиппин, Вьетнам улсын хяналтын багагүй газар нутаг тус маргаантай асуудлуудтай холбогддог байна.

АНУ-ын Батлан хамгаалах яам Өмнөд Хятадын тэнгис дэх маргаантай бүс нутгийн аралд тус улсын байлдааны хөлөг онгоц ойртож очсон талаар баталсан юм. Гэсэн хэдий ч АНУ-ын Номхон далайн флот энэ талаар дэлгэрэнгүй мэдэгдэл хийгээгүй ч өнгөрсөн ням гарагт Америкийн "Стэтхем" байлдааны хөлөг онгоц Өмнөд Хятадын тэнгист хэвийн дасгал сургуулилт хийсэн гэж мэдэгдэлдээ онцолсон юм байна.