XIII зууны үеийн зураач Чимабуэний уран бүтээл Францын хойд зүгийн хотоос өнгөрсөн есдүгээр сард олдсон юм. Тодруулбал, Компьень гэх хотын 90 гаруй настай нэгэн Франц эмэгтэйн гал тогооны өрөөнд энэхүү алдарт зураг өлгөөтэй байжээ.

Удалгүй “Christ Mocked” гэх нэртэй зураг дуудлага худалдаанд орж, 27 сая ам.доллараар зарагдсан байна. Сэргэн Мандалтын өмнөх үеийн зураач Чимабуэний зургийг Чили улсын уран зураг сонирхогчид худалдан авсан мэдээлэл гарчээ.

Харин Францын зүгээс дээрх зургийг үндэсний үнэт соёл, бүтээлд тооцож, хилээр гаргахыг хориглох шийдвэр гаргажээ. Дээрх бүтээлийг 30 сарын хугацаанд хилээр гаргахыг хориглож байгаа төдийгүй энэ хооронд олон нийтийн дунд хандивын аяныг зохион байгуулж, “Christ Mocked” зургийг Францын талд үлдэхэд шаардлагатай мөнгийг босгохыг зорьж байна.

Чимабуэний гурван зураг л өнөөдрийг хүртэл хадгалагдаж ирсний нэг нь 1280-аад оны үед зурсан гэгддэг энэ бүтээл юм.