Азийн хөгжлийн банк (АХБ)-ны Дэд ерөнхийлөгч Скотт Моррис Цөлжилттэй тэмцэх тухай Нэгдсэн Үндэстний Байгууллагын конвенцын Талуудын 17 дугаар бага хуралд оролцохоор Монгол Улсад айлчлал хийж байгаатай холбогдуулан Сангийн сайд З.Мэндсайхан түүнийг хүлээн авч танилцах уулзалт хийлээ.

Уулзалтын хүрээнд АХБ-тай хамтран хэрэгжүүлэхээр төлөвлөж буй Монгол Улсад нэн шаардлагатай байршлуудад сургууль, цэцэрлэг болон эмнэлэг барих, онцгой байдлын байгууллагуудыг тоног төхөөрөмжөөр хангаж, сайжруулах төслүүдийн талаар санал солилцов.

Монгол Улс Төв Азийн Эдийн засгийн хамтын ажиллагааны (КАРЕК) хөтөлбөрийн Сайд нарын уулзалтыг 2026 онд даргалж, Улаанбаатар хотноо 09 дүгээр сарын 28-аас 10 дугаар сарын 02-ны өдрүүдэд зохион байгуулах бөгөөд уулзалтын хүрээнд АХБ-ны Ерөнхийлөгч Масато Канда Монгол Улсад айлчлал хийхээр мөн төлөвлөж байна.

Талууд тус айлчлалын үеэр Монгол Улс болон АХБ хоорондын хамтын ажиллагаа, стратегийн тэргүүлэх чиглэлүүдийг хэлэлцэж, хэрэгжүүлэхээр төлөвлөж буй төсөл, хөтөлбөрүүдийн баримт бичгүүдэд гарын үсэг зурж, хэрэгжилтийг шуурхай эхлүүлэхэд итгэлтэй буйгаа илэрхийлэв гэж Монгол Улсын Сангийн яамнаас мэдээллээ.