Орон нутгийн  цагаар өнөө өглөө 8 цаг  41 минут  буюу  Улаанбаатарын цагаар  9 цаг  41 минутад Өмнөд Солонгосын нийслэл  Сөүл  хот дахь Ёнсе их сургуульд дэлбэрэлт болсон байна. Үүний уршгаар нэг багш гэмтэж, шархадлаа.

Цагдаагийнхан үүнийг террорист халдлага байж болзошгүй гэж шалгаж  байна.  Тус сургуулийн  багш,  профессор Ким ирсэн илгээмжийг  задлах үед дэлбэрэлт болжээ. Цагдаагийн тусгайгийнхан хэргийн газар  ажиллаж  байна. 

Профессорын  мэдүүлснээр  ажилдаа ирэхэд нь хаалганых нь бариулд хайрцагтай зүйл бүхий уут  өлгөөтэй байжээ. Тэрбээр өөрт нь  илгээмж  ирж  гэж бодоод задлахад дэлбэрэлт болжээ.  

Цагдаагийнхан дэлбэрэлтийн шалтгааныг хэд хэдэн  таамаг дэвшүүлэн шалгаж байна. Үүнд, профессорын шавь нарын нэг нь "өшөө"-гөө  авах  гэсэн байж  магадгүй гэдэг хувилбар  ч багтаж буй аж. Профессор Ким тус их сургуульд архитектурын багшаар ажилладаг юм байна.