АНУ-ын Бүгд Найрамдах намаас Конгрессын төлөөлөгчдийн танхимын нөхөн сонгуульд нэр дэвшигчид ялалт байгууллаа. Тодруулбал, Жоржиа мужийн 6-р тойрогт  Бүгд Найрамдах намаас нэр дэвшсэн Карен Хандел, харин Өмнөд Каролайнд тус намын Ральф Норман ялалт байгуулжээ.

Мягмар гарагт болсон нөхөн сонгууль Бүгд найрамдахчууд болон Ардчилсан намынхны аль алинд нь онцгой чухал ач холбогдолтойд тооцогдож байсан юм. Энэ  сонгууль Ерөнхийлөгч Трамп болон Бүгд найрамдахчуудад итгэх ард иргэдийн итгэл хэвээрээ байгаа эсэхийн гол шалгуур гэж үнэлэгдэж байсан билээ.

Ардчилсан намынхан 1988 оноос хойш Бүгд найрамдахчуудад итгэл хүлээлгэж ирсэн Жоржиа мужийн 6-р тойрогт өрсөлдсөн Жон Оссоффт ихээхэн найдлага тавьж байсан юм. Тиймээс ч сонгуулийн өмнө олон сая долларын хандив цуглуулж чадсан. Хамгийн өртөг өндөртэй нөхөн сонгууль ч гэж тодорхойлогдож байсан.

Гэвч энэ тойрогт  ялалт байгуулж чадсангүй. Мөн Өмнөд Каролайнд Ардчилсан намаас Арчи Пэрнелла өрсөлдсөн. Ихээхэн найдвар тавьж байсан Ардчилсан намын нэр дэвшигч багахан саналаар Ральф Норманд ялагдаад байна. Жоржиа мужийн 6-р тойргийн депутатын суудал Конгрессын гишүүн Том Прайс Трампын засаг захиргааны эрүүл мэндийн сайдаар томилогдсонтой холбоотойгоор сулраад байсан юм.

Харин Умард Каролайн мужийн 5-р тойрогт ялалт байгуулж Конгресст сонгогдсон Мик Малвейни "Цагаан ордон"-ы төсөв санхүү эрхэлсэн захирлын алба хаших болсон тул нөхөн сонгууль зохион байгуулсан нь энэ юм.