Засгийн газар, сөрөг хүчин хоёр харилцан ярилцаж чадахгүй тохиолдолд Венесуэлд бий болсон улс төрийн хямрал цус асгаруулалтаар төгсөх магадлал маш өндөр гэж яриа хэлэлцээнд зуучлагч Ватиканы төлөөлөгч хамба Клаудио Челли үзэж байна.

Тэрбээр өчигдөр “Ля насион” сонинд өгсөн ярилцлагадаа "Хэрвээ аль нэг төлөөлөгч яриа хэлэлцээнээс татгалзах юм бол Ромын хамба биш эсрэгээр Венесуэлийн ард иргэд хожигдоно. Ингэх тохиолдолд цус гарах нь тодорхой. Тэгээд ч энд цус асгарахаас айхгүй байгаа хүмүүс байна. Үүнд л би сэтгэл маш их зовж байна” гэжээ.

Хамбын хэлж байгаагаар Венесуэлд маш хүнд байдал тогтсон, зөвхөн улс төрийн гэлтгүй нийгмийн, эдийн засгийн хүрээнд байдал хүндэрсэн, хоол хүнс, эм тариа маш их дутагдаж байна. Өнгөрсөн 10 дугаар сарын 30-нд Каракас хотод Ерөнхийлөгч Николас Мадуро тэргүүтэй Засгийн газрын төлөөлөгчид сөрөг хүчнийхэнтэй уулзаж, улс орны байдлыг намжаахад чиглэсэн яриа хэлэлцээ хийсэн юм.

Энэ уулзалт тодорхой үр дүнд хүрээгүй ч талууд энэ сарын 11-нд дахин уулзахаар тохирсон байна. Венесуэлийн сонгуулийн хороо Николас Мадурог огцруулах тухай асуудлаар бүх нийтийн хоёр дахь шатны санал хураалт явуулах ажлыг тодорхой бус хугацаагаар хойшлуулахаар шийдсэн нь улс төрийн хямралыг улам хурцатгасан юм.