Иракийн арми Мосул хотын ойролцоох эртний түүхэн дурсгалт газрыг "Исламын улс"ын хяналтаас чөлөөлсөн байна. Эртний Ассирийн эзэнт гүрний нийслэл байсан Нимруд хотын туурь нь 2 жилийн өмнөөс эхлэн алан хядагчдын гарт ороод байсан юм. Түүх соёлын их өв болсон энэ газрыг эргүүлэн авах ажиллагааг амжилттай гүйцэтгэсэн болохыг Иракийн армийн командлагч өчигдөр албан ёсоор мэдэгдлээ. Энэ туурь нь аль эрт 9 дүгээр зууны үед харьяалагдах бөгөөд Иракийн 2 дахь том хот болох Мосулаас урагш 30 км-ийн зайд оршдог юм байна. Энд эртний хааны ордны туурь, хана туурганы зураг, хөшөө баримал, ихэс дээдсийн бунхан зэрэг түүхийн ховор нандин үзмэрүүд байдаг тухай албаныхан мэдээлж байна.

Харамсалтай нь "Исламын улс" алан хядагч бүлэглэлийн дайчид энэ газрыг эвдэн сүйтгэж, түүх соёлын үнэт өвийг устгасан байгааг дүрс бичлэгт харуулжээ. Иракийн засгийн газраас хотын аюулгүй байдлыг бүрэн хангасныхаа дараагаар мэргэжлийн багийг илгээж, дахин засварлах боломжтой хэсгүүдийг сэргээх ажлыг эхлүүлнэ гэдгээ мэдэгдээд байна. Үүний зэрэгцээ Мосулыг чөлөөлөх ажиллагаа амжилттай үргэлжилж, өргөн фронтоор урагшилж байгааг албаныхан мэдээллээ. Гэвч хотын иргэдийн аюулгүй байдал хангагдаж чадахгүй байгаа нь хамгийн их санаа зовьноосон асуудал болж байгааг Олон улсын хүний эрхийн байгууллагууд уламжилж байна.