Сирийн бүслэгдсэн хот, суурингуудад амьдарч  байгаа  хүүхдийн тоо  сүүлийн нэг жилийн  дотор хоёр дахин өсч, 500 мянгад хүрээд байна. Энэ тухай НҮБ-ын Хүүхдийн сангаас мэдээлсэн юм.

Сирийн нийт 16 хот, суурин бүрэн гадаад ертөнцөөс таслагдсан байдалтай байгаа бөгөөд хүмүүнлэгийн тусламж  авах боломжгүй,  наад  захын үйлчилгээ  байхгүй  газар болчихоод байна. "Исламын улс" бүлэглэлийн зэвсэгт дайчдын хяналтад байгаа,  одоо  ширүүхэн тулаан болж буй Алеппо хотын  зүүн хэсэгт  л гэхэд  100 гаруй мянган хүүхэд  байгааг  ЮНИСЕФ-ийн тайланд тэмдэглэсэн байна.

Дайны  байдалтай  байгаа энэ хот, суурингуудад  хүүхдүүд  тоглож наадаж,  сургууль, цэцэрлэгт сурч чадахгүй байгаа төдийгүй  эмнэлгийн тусламж авч чадахгүй, өлөн зэлмүүн  амьдарч  байна.  Мөн  хүүхдүүдийг  сургууль, цэцэрлэг, эмнэлгийн  доод  хонгилд  л  сургаж, эмчилж, тоглуулж  байгааг  тэмдэглэжээ. 

Сирийн ийм  бүслэгдсэн хотын нэгд сайн дурынхан  хэд хэдэн байрны  доод  хонгилыг нэгтгэж  тоглоомын талбай  гаргаж  өгсөн  байна. Энд өдөрт 200 гаруй  хүүхэд  тоглодог тухай ч мэдээлж  байна.  Мөн  өөр  нэг бүслэгдсэн хотод байшингийн доод  хонгил дахь сургуульд  250 охин сурч  байгаа юм байна. 

Сирийн  дайнаас болж  сая сая хүний  амьдрал  там болж  хувираад  байна. НҮБ-ын хүүхдийн  сангийн гүйцэтгэх захирал Энтони Лейк Сирид  зэвсэгт мөргөлдөөн эхэлснээс хойш  яг зургаан жил  болох гэж  байгааг тохиолдуулан дайтагч  талуудад хандаж  хот, суурингуудын бүслэлтийг сэтэлж  шуурхай, саадгүйгээр, байнга хүмүүнлэгийн тусламж хүргэх боломжоор хангаж өгөхийг уриалсан байна.