Нийслэлийн иргэд амралт чөлөөт цагаа зөв боловсон өнгөрүүлэх, хоккей, тэшүүрийн тамирчид бэлтгэл сургуулилтаа хийх боломжтой нэгэн мөсөн талбай ашиглалтад орсон байна.

Сүхбаатар дүүргийн 5-р хороо, 6-р сургуулийн гадна талбайд дүүргийн хөрөнгө оруулалтаар бүтээн байгуулсан хоккейн талбай нээлтээ хийжээ. Нээлтэд сургуулийн хүүхэд багачууд, иргэдийн төлөөлөл, хоккейн спортоор хичээллэгчид болон дүүргийн Засаг даргын орлогч Л.Амарзаяа, 5-р хорооны Засаг дарга С.Бат-өлзий, сургуулийн захирал Ц.Алтангэрэл, дүүргийн биеийн тамир,спорт хорооны хамт олон Монголын хоккейн холбооны төлөөлөл оролцсон байна.

Уулын цана, мөсний шагайчдад бэлтгэл хийх орчин боломжийн байдаг бол хоккейчдийн хувьд тийм ч элбэг биш. Тиймээс хоккейн тамирчид “Бидний бэлтгэл хийх талбай нэгээр нэмэгдэж байгаад баяртай байна” гэсэн юм.

Энэхүү хоккейн талбай нь 30х60 хэмжээтэй бөгөөд өвлийн улиралд хоккей, тэшүүрийн тэмцээн зохиогдох бол зун хүүхэд, залуус ролекоор өрсөлдөж болох ажээ.