Польш улсын өмнөд хэсэгт байрладаг Краков хот нь 760,000 хүн амтай, тус орны хоёр дахь том хот гэхээс гадна уг хотыг Малополск буюу жижиг Польшийн нийслэл гэдэг. Тус муж нь өмнө талаараа Словаки улстай хиллэнэ.  Байршлын хувьд хөндийд байрладаг хот. Энэ нь агаар дахь бохирдол агаарын дээд давхаргад хүртэл хуримтлагдах нөхцлийг бүрдүүлдэг.

Краков хотын агаарын бохирдлын гол эх үүсвэр бол үйлдвэрүүд байдаг. Агаар дахь хүхрийн давхар ислийн хэмжээг зөвшөөрөгдөх хэмжээнд хүртэл барьж чаддаг бол харин агаар дахь тоосонцрын хэмжээ зөвшөөрөгдөх хэмжээнээс давдаг нь халаалтад нүүрс хэрэглэдэг болон тээврийн хэрэгслээс гарах утаа, бохирдуулагч бодисуудтай холбоотой юм.

Тус муж нь агаарын чанарын хяналтын 20 станцтайгаас нэг нь явуулын станц байна. Агаарын чанарын талаарх мэдээ, мэдээллийг шууд автоматаар вэб хуудаст байрлуулдаг.  Эдгээр мэдээ, мэдээллийг үндэслэн Засгийн газар агаарын бохирдлын талаарх  мэдээ тайланг гаргаж, агаарын бохирдлын хэмжээ зөвшөөрөгдөх түвшнөөс хэтэрч байгаа эсэхэд хяналт тавьдаг байна.

Жилд  дунджаар 14 удаа мэдээ, тайланг гаргадаг. Харин тус муж агаарын бохирдлын өсч буй түвшинг хянах өөр нэгэн төхөөрөмж зохион бүтээсэн нь агаарын чанарыг хэмжигч нисдэг дрон юм. Энэхүү нисдэг төхөөрөмжийг зохион бүтээгчид тус нисдэг дрон нь агаарын бохирдлыг бууруулах төлөвлөгөөнд томоохон түлхэц болохуйц бүтээл болохыг хэлж байгаа. Тус дрон нь өндөр мэдрэгчтэйгээс гадна, 34 удаа оптик дурангаар томруулж харах чадалтай камераар тоноглогджээ.