Кристин Лагардыг Францын шүүхээс  ажилдаа хайнга  хандсанд  буруутай гэж үзсэн  ч тэрбээр Олон улсын валютын сангийн  тэргүүний үүрэгт  ажлаа  цаашид  ч  үргэлжлүүлэх  болно. Энэ тухай олон улсын санхүүгийн тус байгууллагын захирлуудын зөвлөлөөс гаргасан мэдэгдэлд  тэмдэглэсэн байна.

Кристин Лагард захирлуудын зөвлөлд хандаж өндөр итгэл хүлээлгэсэнд талархаж байгаагаа илэрхийлсний хамтаар  цаашид  улам  хичээн  ажиллахаа амалсан  байна.  Францын  шүүх Олон улсын  валютын  сангийн тэргүүн  Лагардыг  тус улсын сангийн  сайдаар  ажиллаж  байхдаа  ажилдаа  хайнга  хандсан  буруутай  гэсэн шийдвэр гаргасан  ч ямар нэгэн  ял шийтгэл  оноогоогүй байна. 

Хатагтай Лагардын  нэр 1990 оноос эхтэй  Тапигийн гэж нэрийдсэн хэрэгтэй холбогдох болсон юм. 1992 онд тус улсын  Ерөнхийлөгч  Франсуа Миттеран  тухайн  үед   Францдаа   нэрд  гарч  байсан  бизнесмэн Бернар  Тапиг  хотуудын  асуудал  эрхэлсэн  сайдаар томилсон  юм.  Тэр  үед  Адидас  компаниа  ашиг  сонирхлын зөрчилд  орохгүйн тулд  худалдах  шаардлагыг  түүнд  тавьж байсан.  Энэ  дагуу  Францын  төрийн мэдлийн  Кредит  Ионнайс  банкны  зуучлалтайгаар Адидас компаниа  худалдсан юм.  Гэвч  1994 онд  бизнесмэн  Тапи дампуурлаа  зарлаж  банкныхныг  үүндээ  буруутгасан.

Харин 1996 онд Парисын худалдааны шүүх дээр Тапи болон  банкны  хоорондох маргааныг  шүүх  болсон. 2007 онд  шүүх бие даасан шинжээчдийн хороогоор энэ  хэргийг  хянан  шийдвэрлүүлэх  шийдвэр гаргасан.  Харин тус хороо Тапип  403  сая еврогийн  нөхөн  төлбөр олгох шийдвэр гаргасныг  тухайн үед  Сангийн сайдаар ажиллаж байсан Лагард  дэмжин  баталсан  юм. 

Үүнээс болоод  Кристин Лагарт  сөрөг хүчнийхэн төдийгүй олон нийтийн шүүмжлэлтэй тулгарч байсан. Улмаар  2011 онд  Францын ерөнхий прокурор  Жан Луи  Надаль  Кристин Лагардын  дээрх алхмыг нягтлан шалгах санаачилга гаргаснаар уржигдрын шүүх хурал болсон юм.