ГССҮТ-ийн даргаар Ц.Энхбаярыг томилсныг эсэргүүцсэн тус эмнэлгийн эмч, ажилтнуудын асуудлыг шийдвэрлэхээр Эрүүл мэндийн сайдын зөвлөл өнөөдөр тус эмнэлэгт хуралдаж байна. Хурлын үеэр ажил хаялт, эсэргүүцлийн арга хэмжээ зохион байгуулж, ажлаас халагдах өргөдөл өгсөн эмч нартай зөвлөлийн гишүүд уулзаж, хүсэлт, шаардлага, тайлбарыг нь  сонслоо. Сайдын зөвлөлийн хурал түр завсарлаж, ГССҮТ-ийн эмч, ажилтнуудын дунд нууц санал хураалт явуулах болсныг дуулгалаа. Зөвлөл  үүсээд буй нөхцөл байдлыг дүгнэхдээ, хэсэг бүлэг хүмүүсийн явуулга, ашиг сонирхлын зөрчилтэй холбоотой байж болзошгүй гэж үзсэн тул ийнхүү эмч, ажилтнуудын саналыг нэг бүрчлэн авахаар шийджээ. Тодруулбал, ГССҮТ-ийн даргын томилгоог эсэргүүцэж, яаралтай цуцлахыг шаардаж буй нь бодитой эсэх, үнэхээр тийм шаардлага байгаа эсэхийг, эсвэл хэн нэгний зохион байгуулж буй явуулга, турхиралт байгаа эсэхийг тодруулахаар болсон байна. Одоо ГССҮТ-ийн 250 гаруй эмч, ажилтан нууц санал хураалтад оролцохоор танхимд цуглаж. Тэдний хувьд санал хураалтыг ил тодоор явуулах хүсэлт гаргасан ч зөвлөлийн гишүүд нууцаар явуулах нь зүйтэй гэж үзсэн бөгөөд ГССҮТ-ийн удирдлага болон эмч нарын төлөөллөөс тус тус хоёр хүн саналыг тоолж, асуудлыг шийдвэрлэхээр боллоо.