Серб  улс  Косовогийн  чөлөөлөх армийн  хээрийн захирагч,  дангаар  тусгаар  тогтнолоо зарласан  Косовогийн  Ерөнхий сайд асан Рамуш Харадинайг  шилжүүлэн  өгөхийг Францын  талаас  шаардлаа. Энэ  тухай  Сербийн  засгийн газрын  тэргүүн Александр Вучич мэдэгдсэн юм. Косовогийн Ерөнхий сайд  асан  Харадинайг Базель Мюлуз Фрайбург  нисэх онгоцны буудалд 1998-99 онд Косово болон Метохи дахь зэвсэгт мөргөлдөөний үеэр цэргийн гэмт хэрэг үйлдсэн  хэргээр  саатуулан  баривчилсан  байна.

Сербийн засгийн газраас 2004  онд Интерполд олгосон зөвшөөрлийн дагуу энэ баривчилгааг хийсэн аж. Сербийн хууль зүйн  яам  Францын   хууль  шүүхийн байгууллагад Харадинайн хэргийн материалыг илгээгээд байгаагаа мэдэгдэж байна.  Түүнийг Сербийн талд шилжүүлэн өгөх  эсэх  шийдвэрийг  Францын Кольмар хотын шүүхээс гаргах ёстой юм байна.  Харадинай нь 2004-2005 оны хооронд дангаар  тусгаар тогтнолоо зарласан Косово улсын засгийн газрыг тэргүүлж  байсан юм.

Харин  одоогийн Косово  Албанийн  засгийн  газар  эмхлэн байгуулагдахад  түүний тэргүүлдэг  Косовогийн ирээдүйн төлөө нэртэй нам  хэт сөрөг хүчний  эгнээнд орсон  юм.  Албаний  засгийн газрын  хувьд  Харадинайг  баривчилсныг  буруушааж байгаагаа илэрхийлж  байна. Мөн Косовогийн  гадаад хэргийн  сайд  Ходжай  Серб  улс  Харадинайг  шилжүүлэн  өгөхийг шаардаж  байгаа нь  Балканы  байдлыг улам  хурцатгах  уриалга  болж байна хэмээн буруутгаж  байна.

1999  онд  Косовог  чөлөөлөх  армийн  Албани  салан тусгаарлагчид  болоод  Сербийн  цагдаа  нарын  хоорон дахь зэвсэгт мөргөлдөөн одоогийн  Серб,  Черногороос  бүрдэж  байсан  Югослав  улсад  НАТО гийнхон агаарын цохилт хийхэд хүргэсэн юм.  2004 онд  Косовогийн Албаничууд  үймээн  дэгдээж сербүүдийг тус хязгаараас  шахан  гаргасан. Харин  2008 онд  Приштин дэхь  Косово Албаничууд Сербээс тусгаарлаж  байгаагаа  зарласан юм.  Дангаар тусгаар  тогтнолоо зарласан  тус улсыг  Сербиэс гадна  ОХУ, Хятад,  Израйль  Иран гээд  хэд хэдэн орон  одоо ч хүлээн зөвшөөрөөгүй  байгаа юм.