Ерөнхий сайд ээлжит 30 минутын уулзалтаа хийлээ. Энэ удаад  өмнөд хөршид хийсэн айлчлалынхаа үр дүнг танилцуулсан юм. Тэрбээр “Хоёр орны ирэх 20 жилийн харилцаа, хамтын ажиллагааны чиглэлийг тодорхойлсон Стратегийн түншлэлийн харилцааг хөгжүүлэх дунд, урт хугацааны хөтөлбөрийг баталсан. Мөн Засгийн газрын тэргүүнүүдийн хэлэлцээний дагуу  холбогдох шатны байгууллагуудын хооронд 11 баримт бичгийг албажуулан гарын үсэг зурлаа.  Хятадтай хийх худалдаа, эдийн засгийн хамтын ажиллагаанд анх удаа тодорхой тоо, хэмжээ ярьж тогтоолоо. Засгийн газрын түвшний яриа хэлэлцээнд шинэ механизм бий болгож, Ерөнхий сайд, Эдийн засгийн хөгжлийн сайд нарын түвшний уулзалтыг жил бүр хийхээр тохиролцлоо” гэж хэлсэн юм. Мөн эдийн засгийн хамтын ажиллагааны талаарх хэд хэдэн жишээ татлаа.

Тухайлбал, 50 тэрбум ам.доллартай тэнцэх өртөгтэй нэг тэрбум тонн нүүрсийг 20 жилийн хугацаанд Хятадад нийлүүлнэ. Монголд нүүрс хийжүүлэх үйлдвэр байгуулан хийн түлш гаргаад, заримыг нь Хятадад экспортолно. Өөрийн орны түүхий тосны бүтээгдэхүүн “Монгол-93” шатахууны нийлүүлэлтийг 4 дахин нэмж, сард 35-40 мянган тонныг авахаар боллоо. Хилийн боомтуудыг төмөр замаар холбож, хоёр орны худалдааны албан ёсны боомтын тоог дөрвөөр нэмж, далайн шинэ гарцын талаар ярилцлаа. Чухал шаардлагатай мэргэжлүүдээр өмнөд хөршид таван жилийн хугацаанд жилд 1000 оюутан сургахаар болжээ. Нээлттэй ярилцлагаар сэтгүүлчид сонирхсон асуултдаа хариулт авдаг.

Энэ удаад төмөр замын холбогдолтой асуудлуудаар 3 улсын ажлын хэсэг удахгүй Монголд уулзаж ярилцана, цалин тэтгэврийн хэмжээг салбар, бүтээмжээс нь хамааруулан шатлалтай нэмэхээр ирэх оны төсөвт тодорхой мөнгө суулгасан, Оюутолгойн хэлэлцээрийг урагшлуулахын тулд Ерөнхий сайдын хувиар хэд хэдэн санаачилга гаргаж, ажлыг нь эрчимжүүлсэн, баруун 3 аймагт барьж буй битүү захыг ойрын 3 сард багтаан дуусгана, олны анхаарлын төвд байгаа зарим эмнэлгийн асуудлыг салбар хариуцсан сайд эргэн харж шийдвэрлэхээ мэдэгдсэн гэж хариуллаа.